قالىپتى جاعدايعا كوشەمىز دەسەك، قاۋەسەتكە سەنبەي ەكپەنى الۋىمىز قاجەت - ساعىنتايەۆ

الماتى. قازاقپارات- باقىتجان ساعىنتايەۆ قالاداعى ەپيدەميولوگيالىق جاعدايعا ارنالعان ونلاين بريفينگتە كوروناۆيرۋسقا قارسى ۆاكسيناتسيانىڭ ماڭىزدى ەكەنىن ايتتى، دەپ حابارلايدى قازاقپارات ءتىلشىسى.

قالا اكىمى ۆاكسينا تەگىن سالىناتىنىن اتاپ ءوتتى. قاراجات بيۋدجەتتەن بولىنەدى. «قازىر ءبىزدىڭ قولىمىزدا رەسەيلىك «سپۋتنيك V» ۆاكسيناسى بار. دەنساۋلىق ساقتاۋ مينيسترلىگىنىڭ مالىمەتىنە سۇيەنسەك، ەلىمىزگە قىتايلىق SinoVac ۆاكسيناسى جەتكىزىلەدى. بىلتىر جەلتوقساندا قوسىمشا ەكى مىڭنان اسا ەرىكتى QazVac وتاندىق ۆاكسيناسىمەن ەگىلدى. ءساۋىردىڭ سوڭىنا دەيىن التى مىڭعا جۋىق دوزا اكەلەدى دەگەن ۇمىتتەمىز. سول جاعدايدا عانا حالىق قانداي ۆاكسينا سالدىراتىنىن تاڭداي الادى»، - دەدى ساعىنتايەۆ.

سونداي-اق ول تۇرعىنداردى ۆاكسيناعا قاتىستى ءتۇرلى الىپ- قاشپا اڭگىمەلەرگە سەنبەۋگە شاقىردى.

«ءبارىمىز، كورىپ، ءبىلىپ وتىرمىز، ءبىر جىل ءوتتى بۇل اۋرۋدىڭ شەشىمى جوق. قايتا- قايتا لوكداۋن جاساپ، كارانتينگە جاۋىپ جاتساق تا بۇل اۋرۋ كەتپەي جاتىر. ءبىز قاۋىپسىزدىكتىڭ بارلىعىنان وتتىك. اۋرۋدىڭ تارالۋى بىردە كوتەرىلىپ، بىردە ءتۇسىپ وتىر. ەندى بريتاندىق، وڭتۇستىك شتامم شىعىپ جاتىر. مۇنىڭ مۋتاتسياسى ارى قاراي كەتە بەرەدى. كەلەسى جىلى باسقا دا مۋتاتسياسى شىعۋى مۇمكىن. بۇل ۆيرۋس بىزدەن ەشقايدا قاشىپ كەتپەيدى. مەنىڭ تۇسىنىگىمدە ءومىر بويى بىزبەن بولادى. سول سەبەپتى بۇدان قورعانامىز دەسەك بىزگە ۆاكسينا كەرەك. باسقا شەشىمىن كورىپ وتىرعان جوقپىز. ونى مامانداردىڭ بارلىعى ايتىپ وتىر. ءىرى مەملەكەتتەردىڭ ءبارى تەك ۆاكسينامەن شەشىپ جاتىر. ەگەر بۇرىنعى قالىپتى جاعدايعا كوشەمىز دەسەك وندا قورىقپاي، قاۋەسەتكە ەرمەي ەكپەنى قابىلداۋىمىز قاجەت»، - دەدى ساعىنتايەۆ.

اۆتور: الما مۇقانوۆا