14:00, 02 - ءساۋىر 2021 | GMT +5
قاسىم-جومارت توقايەۆ ۇلتتىق بانك ءتوراعاسىن قابىلدادى
نۇر-سۇلتان. قازاقپارات - قازاقستان پرەزيدەنتى قاسىم-جومارت توقايەۆ ۇلتتىق بانك ءتوراعاسى ەربولات دوسايەۆتى قابىلدادى، دەپ حابارلايدى اقوردا.
مەملەكەت باسشىسىنا بيىلعى جىلدىڭ I توقسانىنداعى اقشا- كرەديت ساياساتىن ىسكە اسىرۋدىڭ الدىن الا قورىتىندىسى تۋرالى باياندالدى. ۇلتتىق بانك ءتوراعاسى الەمدىك ەكونوميكانى قالپىنا كەلتىرۋ بارىسىندا ىقتيمال نەگىزگى سىن-قاتەرلەر جايىندا ايتتى.
پرەزيدەنتكە ەلىمىزدىڭ 2020 -جىلعا ارنالعان تولەم بالانسى، جالپى حالىقارالىق رەزەرۆتەرىنىڭ جاعدايى، التىن قورىن حەدجيرلەۋ تاسىلدەرى جونىندە مالىمەت بەرىلدى.
ەربولات دوسايەۆ مەملەكەت باسشىسىنىڭ قازاقستان ازاماتتارىنىڭ زەينەتاقى جيناقتارىن مەرزىمىنەن بۇرىن پايدالانۋ جانە ۇلتتىق تولەم جۇيەسىن قۇرۋ تاپسىرمالارىنىڭ ورىندالۋ بارىسى تۋرالى بايانداپ، تۇرعىن ءۇي ساياساتىن رەفورمالاۋعا قاتىستى ۇسىنىستارىن جەتكىزدى. كەزدەسۋ سوڭىندا مەملەكەت باسشىسى ۇلتتىق بانك ءتوراعاسىنا ءبىرقاتار ناقتى تاپسىرما بەردى.
