تۇركيا كوروناۆيرۋس ۆاكتسيناسىن كلينيكالىق سىناقتان وتكىزە باستادى
بۇل تۋرالى يندۋستريا جانە تەحنولوگيالار ءمينيسترى مۇستافا ۆارانك مالىمدەدى، دەپ حابارلايدى قازاقپارات انادولى اگەنتتىگىنە سىلتەمە جاساپ.
ءمينيستردىڭ ايتۋىنشا، ۆاكتسينانىڭ كلينيكالىق سىناعى سەنبى كۇنى تاڭەرتەڭ باستالدى.
«بۇل - كۇردەلى پروتسەسس، سىناقتىڭ ءبىرىنشى فازاسى ەكى ايدان ەرتە بىتپەيدى»، - دەدى ۆارانك.
ۆەدومستۆو باسشىسى ۆاكتسينانى وندىرۋگە دايىن كاسىپورىنداردىڭ بار ەكەنىن اتىپ ءوتتى.
«ەگەر بارلىق كەزەڭدى ءساتتى قورىتىندىلاساق، جىلدىڭ سوڭىنا دەيىن ءبىزدىڭ 50 ميلليون دوزا الەۋەتى بار ءوز ۆاكتسينامىز بولادى»، - دەپ قوستى ول.
مينيستر ۆاكتسيناتسيانىڭ ەكىنشى كەزەڭىندە ءوزى ەرىكتى بولاتىنىن ايتتى. سونىمەن قاتار ۆارانك مۇرىن ارقىلى ەگىلەتىن ۆاكتسينانىڭ وندىرىسىنە دە توقتالدى.
«اقۋىز نەگىزىندە جاسالعان ۆاكتسينانىڭ بۇل ءتۇرى - الەمدەگى جاڭالىقتاردىڭ ءبىرى. بۇل ۆاكتسينا مۇرىن ارقىلى ەگىلەدى. بارلىق ۋىتتى سىنامالار الىنىپ، جانۋارلاردا سىنالىپ، قوسىمشا جۇمىستار اتقارىلعان. تۇركيانىڭ فارماتسيەۆتيكا جانە مەديتسينالىق جابدىقتاندىرۋ اگەنتتىگىنە حات جولداندى. ەگەر ولار وڭ جاۋاپ قايتارسا، ادامدارعا كلينيكالىق سىناق جاساۋ باستالادى»، - دەپ مالىمدەدى مينيستر.
ۆارانك مۇرىن ارقىلى ەگىلەتىن ۆاكتسينا يننوۆاتسيالىق ەكەنىن اتاپ ءوتتى. ونىڭ قولدانىلۋى الەمدە كەڭ تارالماعان.
«دەگەنمەن وندىرۋشىلەردىڭ الدىن الا قورىتىندىسى، زەرتحانالىق زەرتتەۋلەر مەن جانۋارلارعا جاسالعان سىناما جاقسى ناتيجە كورسەتۋدە. كلينيكالىق سىناما ءساتتى اياقتالادى دەگەن ۇمىتتەمىز»، - دەپ ءۇمىت ءبىلدىردى ۆەدومستۆو باسشىسى.
ۆارانكتىڭ ايتۋىنشا، ءتۇرلى ەلدەر تۇركيادان ۆاكتسينامەن قامتاماسىز ەتۋدە كومەك سۇراعان.
«كەي ەلدەر ۆاكتسينا تاسىمالداۋدا كومەك سۇرايدى، كەي ەلدەر ورتاق ءوندىرىستى جولعا قويماق نيەتتە. مىسالى، كەيبىر ەلدەر سىناقتىڭ ءۇشىنشى فازاسىن بىرگە وتكىزۋدى ۇسىنىپ وتىر. بۇل ارىپتەستىك پروتسەستىڭ ۇزاقتىعىن قىسقارتار ەدى، سونىمەن قاتار پروتسەسكە حالىقارالىق وزەكتىلىك بەرەر ەدى. سونىمەن قاتار بۇل ەلدەر تاسىمالداۋ ماسەلەسىندە ءبىرىنشى قارالادى. شەتەلدەن سۇرانىس بار»، - دەدى ۆارانك.
