ق ر پرەزيدەنتى: تۇركى وركەنيەتىن جاڭعىرتۋدى تۇركىستاندى الەمگە تانىتۋدان باستاۋعا شاقىرامىن
«1992 -جىلى انكارادا وتكەن العاشقى باسقوسۋدا ەلباسى تۇركى ەلدەرىنىڭ باسشىلارى بۇدان بىلاي كيەلى تۇركىستاندا كەزدەسىپ تۇرادى دەپ ايتقان. تۇركىستان بارلىق تۇركى حالىقتارى ءۇشىن قاستەرلى قارا شاڭىراق، قۇتتى مەكەن جانە اڭسارلى اتاجۇرت. بابالارىمىز وسى وڭىردە عۇلاما ۇستاز قوجا احمەت ياسساۋيدەن ءدىني ءبىلىم الىپ، تۇركى يسلام مادەنيەتىن الەمگە تاراتقانى بەلگىلى»، - دەدى قاسىم- جومارت توقايەۆ تۇركى تىلدەس مەملەكەتتەردىڭ ىنتىماقتاستىق كەڭەسىنىڭ بەيرەسمي ءسامميتى بارىسىندا.
مەملەكەت باسشىسى تۇركىلەر كىشى ازياعا بەت بۇرعاندا بۇل قۇندىلىقتار ءتۇپ تامىرىمىزدى ساقتاپ، بىلىگىمىزدى بەكەم ۇستاۋعا نەگىز بولعانىن باسا ايتتى.
«ءبىزدىڭ ماقساتىمىز - تۇركى الەمىن 21 عاسىردا ماڭىزدى ەكونوميكالىق جانە مادەني- گۋمانيتارلىق كەڭىستىكتىڭ بىرىنە اينالدىرۋ. تۇركى وركەنيەتىن جاڭعىرتۋدى ەڭ الدىمەن ياسساۋي مۇراسى مەن قاسيەتتى تۇركىستاندى الەمگە تانىتۋدان باستاۋعا شاقىرامىن. سول سەبەپتى بۇگىنگى سامميت «تۇركىستان تۇركى الەمنىڭ رۋحاني استاناسى» دەپ اتالىپ وتىر. ەلباسى نۇرسۇلتان نازاربايەۆتىڭ باستاماسىمەن تۇركىستان قالاسى تۇبەگەيلى وزگەرىپ، جاڭا كەلبەتكە يە بولدى»، - دەدى ق ر پرەزيدەنتى.
