قازاق ەلى تاعى ءبىر تارلانىنان ايىرىلدى - ايدا بالايەۆا

نۇر-سۇلتان. قازاقپارات - قازاق ەلى تاعى ءبىر توبەسى بيىك تارلانىنان ايىرىلدى.

ق ر اقپارات جانە قوعامدىق دامۋ ءمينيسترى ايدا بالايەۆا كورنەكتى ساۋلەتشى، قازاقستان ەلتاڭباسىنىڭ اۆتورى شوت-امان ءۋاليحانوۆتىڭ قازاسىنا بايلانىستى جەلىدە وسىلاي دەپ كوڭىل ايتتى.

«89 جاسقا قاراعان شاعىندا قازاقستان رەسپۋبليكاسى ەلتاڭباسىنىڭ اۆتورى، تانىمال ءمۇسىنشى، بەلگىلى ارحيتەكتور شوت-امان ءۋاليحان اعامىز دۇنيە سالدى. ءسوز جوق، بۇگىن وسىناۋ ورنى تولماس قايعىعا شوت-امان اعامىزدىڭ وتباسى، اينالا-جاقىندارىمەن بىرگە ونىڭ تاريحي تۇلعاسىن اسپەتتەگەن بۇكىل قازاق ەلى ورتاقتاسىپ جاتىر. ويتكەنى، اسىل اعامىز بويىنداعى بار ءىلىم-ءبىلىمى، تۋما تالانتى، زيالى بولمىسىمەن ۇلت كەلبەتىن ايشىقتاعان ۇلى ەڭبەگىن ۇرپاقتار ەنشىسىنە بايلاپ، مەملەكەتىمىزدىڭ مارتەبەسىنە اينالدىرىپ كەتتى. ونىڭ جارقىن بەينەسى ەل ەسىندە ماڭگىلىك ساقتالادى. مارقۇمنىڭ توپىراعى تورقا، جانى جاناتتا بولسىن!»، - دەپ جازدى مينيستر Facebook - تەگى پاراقشاسىندا.