قازاقستان ەلتاڭباسىنىڭ اۆتورى شوت-امان ءۋاليحانوۆ ومىردەن ءوتتى
«شوت-امان ءۋاليحانوۆتىڭ وتباسى مەن تۋعان-تۋىستارىنا! قازاقستان رەسپۋبليكاسى مادەنيەت جانە سپورت مينيسترلىگىنىڭ اتىنان كورنەكتى ساۋلەتشى، پروفەسسور، قازاقستاننىڭ ەڭبەك سىڭىرگەن قايراتكەرى، «قۇرمەت»، «پاراسات»، «وتان»، «داڭق» وردەنىنىڭ يەگەرى، قازاقستان رەسپۋبليكاسى مەملەكەتتىك ەلتاڭباسىنىڭ اۆتورى، تاۋەلسىز «تارلان» سىيلىعىنىڭ لاۋرەاتى، ق ر ساۋلەتشىلەر، ديزاينەرلەر، جازۋشىلار سۋرەتشىلەر وداعىنىڭ مۇشەسى، بۇكىل الەمدىك شىڭعىس حان اكادەمياسىنىڭ، شىعىس ەلدەرى حالىقارالىق ساۋلەت اكادەمياسىنىڭ، حالىقارالىق ساۋلەت اكادەمياسىنىڭ اكادەميگى (رەسەي فەدەراتسياسى) شوت-امان ىدىرىس ۇلى ءۋاليحانوۆتىڭ قايتىس بولۋىنا بايلانىستى وتباسى مەن جاقىندارىنىڭ قايعىسىنا ورتاقتاسىپ، كوڭىل ايتامىن. شوت-امان ىدىرىس ۇلى سانالى عۇمىرىن سۇيىكتى ىسىنە ارناپ، ماعىنالى ءومىر سۇرگەن ءوز ورتاسىنا سىيلى، بولمىسى بولەك جان ەدى.
ول حالقىمىزدىڭ تاريحىنداعى ارداقتى تۇلعالاردىڭ ەسكەرتكىشىن جاساپ، ەر ەسىمىن ەل اراسىندا ۇلىقتاۋعا، ساۋلەتى كوز تارتار عيماراتتاردىڭ بوي كوتەرۋىنە سۇبەلى ۇلەس قوستى. بۇل قاتاردا ەلوردا تورىندەگى كەنەسارى قاسىم ۇلى، قوستاناي قالاسىنداعى احمەت بايتۇرسىن ۇلى، ەرەيمەنتاۋداعى بوگەنباي باتىردىڭ، ش ق و- داعى حاكىم اباي مەن شاكارىمنىڭ، الماتىداعى شوقان ءۋاليحانوۆ، دينا نۇرپەيىسوۆا، ءالىبي جانگەلدين، توقاش بوكين، عاني مۇراتبايەۆ، نۇرمولدا الدابەرگەنوۆ، تالعات بيگەلدينوۆ، جۇماعالي ساين، تايىر جاروكوۆ، تاحاۋي احتانوۆ، ءابۋ سارسەنبايەۆ، دىنمۇحامەد قونايەۆ، تىلەس قاجىعاليەۆ، قۇرماناي وماروۆا، نۇرعالي تاسماعامبەتوۆ، شافيك چوكينگە ارنالعان تۋىندىنى حالىق جاقسى بىلەدى.
سول سياقتى الماتىداعى «دينامو» ستاديونى، الماتى قالاسى اكىمدىگىنىڭ، قازاق-نەمىس ۋنيۆەرسيتەتى عيماراتىنىڭ، قاراعاندىداعى كوسموناۆتيكا مونۋمەنتى سىندى ەڭسەلى نىساننىڭ جوباسىن جاسادى.
سەگىز قىرلى، ءبىر سىرلى اعامىز ەلىمىزدىڭ ساۋلەت جانە بەينەلەۋ ونەرىنىڭ وزەكتى ماسەلەلەرىن كوتەرگەن كوپتەگەن عىلىمي ماقالامەن قاتار ءبىرقاتار درامالىق شىعارما جازدى.
ولاردىڭ قاتارىندا «تاعدىر»، «شوقاننىڭ انتى»، «اقنۇر»، «شوقاننىڭ اق تۇندەرى»، «تەررور» اتتى پەساسى بار. عيبراتتى ازاماتتىڭ اسىل بەينەسى، ەرەن ەڭبەگى تۋعان-تۋىس پەن قالىڭ قازاقتىڭ كوڭىل ءتورى مەن جۇرەك تۇكپىرىندە ماڭگى ساقتالادى.
مارقۇمنىڭ كوزى تىرىسىندە جاساعان يگى-جاقسى امالدارى الدىنان جارىلقاسىن. جاتقان جەرى جايلى، توپىراعى تورقا، الدى پەيىش، ارتى كەنىش بولسىن!»، - دەپ جازدى مينيستر ءوزىنىڭ Instagram پاراقشاسىندا.
