قۇمار ويىنعا قۇمارتقاندار كوبەيىپ بارادى

نۇر-سۇلتان. قازاقپارات - وتكەن جىلى ەلىمىزدە قۇمار ويىندار مەن ءباس ۇيىمداستىراتىن كومپانيالار مەن بۋكمەكەرلەردىڭ قىزمەتى رەكوردتىق سوماعا جەتتى، دەپ حابارلايدى قازاقپارات ءتىلشىسى.

Finprom.kz پورتالىنىڭ مالىمەتىنشە، 2020 -جىلى قۇمار ويىندار مەن ءباس تىگۋدى ۇيىمداستىرۋ قىزمەتتەرىنىڭ كولەمى 78,6 ميلليارد تەڭگەگە جەتكەن. بۇل كورسەتكىش 2019 -جىلمەن سالىستىرعاندا 6 ەسەگە كوپ. سالىستىرۋ ءۇشىن ايتار بولساق، 2019 -جىلى اتالعان سەكتورداعى قىزمەت كولەمى 13,3 ميلليارد تەڭگە بولاتىن. ال 2020 -جىلدىڭ 4-توقسانىندا عانا قۇمار ويىندار مەن ءباس تىگۋدى ۇيىمدارى قىزمەتىنىڭ كولەمى كۇرت ءوسىپ، نە ءبارى 4 ايدىڭ ىشىندە 59,3 ميلليارد تەڭگەگە جەتتى.

ايتا كەتەرلىگى، 2019 -جىلى قۇمار ويىندار مەن ءباس تىگۋ قىزمەتى كولەمىنىڭ 86 پايىزى ويىن الاڭدارى ورنالاسقان الماتى مەن اقمولا وبلىستارىنا تيەسى ەدى. ءبىراق، 2020 -جىلى جاعداي كۇرت وزگەرىپ، بۇل وڭىرلەرگە قىزمەت كولەمىنىڭ نە ءبارى 19,8 پايىزى عانا تيەسىلى بولدى. وتكەن جىلى كوش باسىنا 58,2 ميلليارد تەڭگەمەن الماتى قالاسى شىقتى.

وڭتۇستىك استانادا 2019 -جىلمەن سالىستىرعاندا سالاداعى قىزمەت كولەمى بىردەن 80,4 ەسەگە ارتقان. ودان كەيىنگى ورىندا الماتى وبلىسى (12,2 ميلليارد تەڭگە) مەن ەلوردا (4,5 ميلليارد تەڭگە) تۇر. قۇمار ويىندار مەن ءباس تىگۋ قىزمەتى كولەمىنىڭ ايتارلىقتاي ءوسىمى اقمولا (3,4 ميلليارد تەڭگە) جانە جامبىل (1,1 ميلليارد تەڭگە) وبلىستارىندا بايقالدى.

اۆتور: مارلان جيەمباي