الماتىدا قوعامدىق كولىكتە ماسكا تاقپاعاندارعا ايىپپۇل سالىنادى

الماتى. قازاقپارات- قالالىق موبيلدىلىك باسقارماسى، كولىك حولدينگى مەن قۇقىق قورعاۋ ورگاندارى قىزمەتكەرلەرىنەن قۇرالعان مونيتورينگ توپتارى جولاۋشىلاردىڭ سانيتارلىق ەرەجەلەردى ۇستانۋىن تەكسەرۋدى قولعا الدى، دەپ حابارلايدى قازاقپارات ءتىلشىسى.

بۇعان دەيىن قوعامدىق كولىكتە باسقارما قىزمەتكەرلەرى رەيد جۇرگىزىپ، تەك ەسكەرتۋ جاساي الاتىن. قازىرگى مونيتورينگ توبى سانيتارلىق ەرەجەلەردى بۇزعاندارعا ايىپپۇل سالىپ، شارا قولدانۋعا قۇقىلى.

«سونىمەن قاتار، قالادا جولاۋشىلاردىڭ قاۋىپسىزدىگىن قامتاماسىز ەتۋ ماقساتىندا كەشەندى ءىس-شارالار جۇزەگە اسىرىلىپ جاتىر. جولاۋشىلار اعىمىنا قاراي جۇكتەمەسى جوعارى 28 باعىت بويىنشا قوسىمشا اۆتوبۋستار شىعارىلىپ، ءجۇرۋ ينتەرۆالى قايتا قاراستىرىلدى. سوڭعى ايالدامالاردا اۆتوبۋس سالوندارىنا دەزينفەكتسيا جاسالادى»، - دەپ حابارلادى اكىمدىكتەن.

سونداي-اق اۆتوبۋستار مەن مەترودا ماسكا تاعۋ قاجەتتىگى تۋرالى اقپاراتتىق اۋديوحابارلاما جاسالادى. جۇرگىزۋشىلەر جۇمىس ۋاقىتىندا ماسكا تاعۋعا مىندەتتەلدى. سونىمەن قاتار، ماسكا تاقپاعان جولاۋشىلاردى قوعامدىق كولىككە كىرگىزبەۋ جانە قاجەت بولعان جاعدايدا ءتۇسىرىپ كەتۋ تۋرالى تاپسىرما بەرىلدى.

كولىك حولدينگى قىزمەتكەرلەرى دە كارانتين كەزىندە سانيتارلىق نورمالاردى بۇزۋشىلارعا ەسكەرتۋ جاساپ، اۆتوبۋستان ءتۇسىرۋ تۋرالى تاپسىرما الدى. الماتىلىقتاردىڭ قاجەتتىلىگىن تولىق وتەۋ ءۇشىن قالاعا مىڭعا جۋىق اۆتوبۋس قاجەت. بۇل باعىتتا جۇمىستار جالعاسىپ جاتىر.

2021-جىلى كوممۋنالدىق اۆتوپارككە 150 جاڭا گازبەن جۇرەتىن اۆتوبۋس جەتكىزىلدى.

جولاۋشىلاردىڭ سۇرانىسىنا قاراي اۆتوبۋستاردىڭ ءبىر بولىگى ەسكى اۆتوبۋستاردى جاڭالاۋعا جانە مارشرۋتتاردى كۇشەيتۋگە، ال ءبىر بولىگى جاڭا مارشرۋتتار اشۋعا جىبەرىلدى. جىلدىڭ اياعىنا دەيىن تاسىمالداۋشىلار ەكى جۇزدەن اسا اۆتوبۋس ساتىپ الۋدى جوسپارلاپ وتىر.