20:26, 30 - ناۋرىز 2021 | GMT +5
الماتى وبلىسى: ءۇش ادام بالقاش كولىنىڭ ورتاسىندا قالىپ قويدى
تالدىقورعان. قازاقپارات - بالقاش كولىنىڭ الماتى وبلىسىنا قاراستى اۋماعىندا ۋاز اۆتوكولىگىن مىنگەن ءۇش ادام كول ورتاسىندا قالىپ قويعان.
باتىستان سوققان جەل سالدارىنان مۇز جارىلىپ، بالىقشىلار جاعاعا جەتە الماعان، دەپ حابارلايدى قازاقپارات ءتىلشىسى.
الماتى وبلىستىق توتەنشە جاعدايلار دەپارتامەنتى باسپا ءسوز قىزمەتىنىڭ مالىمەتىنشە وقيعا 28- ناۋرىزدا بولعان.
«كولدە قالعان ازاماتتار ۆيدەو ءتۇسىرىپ، الەۋمەتتىك جەلىلەرگە جۇكتەگەن. ولار اۋا- رايىنىڭ قولايلىعىن كۇتىپ، جاعاعا ءوز كۇشتەرىمەن شىققان. ۇشەۋى دە سارقان اۋدانى، مۇقان تولەبايەۆ اۋىلىنىڭ تۇرعىندارى»، دەيدى ت ج د باسپا ءسوز قىزمەتىنىڭ وكىلى ازامات جۇرتبايەۆ.
