قازاقستاندا كوروناۆيرۋستىڭ الماتىلىق شتامى پايدا بولۋى مۇمكىن بە

الماتى. قازاقپارات - الماتىنىڭ باس سانيتار دارىگەرى جانداربەك بەكشين قالادا «كوروناۆيرۋستىڭ الماتىلىق شتامى پايدا بولدى» دەگەن اقپاراتقا قاتىستى پىكىر ءبىلدىردى، دەپ حابارلايدى قازاقپارات ءتىلشىسى.

جانداربەك بەكشيننىڭ ايتۋىنشا، بۇگىندە «الماتىلىق شتامعا» قاتىستى رەسمي اقپارات جوق. «بريتاندىق جانە وڭتۇستىك افريكا شتامىنا قاتىستى زەرتحانالاردان رەسمي جاۋاپ الدىق. ال «الماتىلىق شتامعا» قاتىستى رەسمي مالىمەت جوق. ارينە، ب ا ق-تا ءارتۇرلى نارسە جازىلادى. ونى تەكسەرىپ الۋ قاجەت، قولدا رەسمي مالىمەت بولۋى كەرەك قوي. ءبىز رەسمي ورگان رەتىندە تەك رەسمي مالىمەتكە سۇيەنە الامىز»، - دەدى جانداربەك بەكشين.

ايتا كەتەيىك، عالىمدار قازاقستاندا COVID-19-دىڭ «الماتىلىق شتامى» پايدا بولۋى مۇمكىن ەكەنىن ايتقان بولاتىن. حابار 24 تەلەارناسىنىڭ مالىمەتىنشە، كوروناۆيرۋستىڭ جاڭا شتامى الماتىعا عانا ءتان بولۋى مۇمكىن.