داڭقتى سۇرمەرگەن ىبىرايىم سۇلەيمەنوۆكە «حالىق قاھارمانى» اتاعى بەرىلسە دەيمىز - سەناتور
مۇنداي ۇسىنىستى سەناتور مۇحتار قۇل-مۇحاممەد كوتەرىپ وتىر، دەپ حابارلايدى قازاقپارات ءتىلشىسى. جاقىندا «ەگەمەن قازاقستان» گازەتىنە كورنەكتى مەملەكەت قايراتكەرى، سەناتتىڭ حالىقارالىق قاتىناستار، قورعانىس جانە قاۋىپسىزدىك كوميتەتىنىڭ ءتوراعاسى، الاششىل ازامات مۇحتار قۇل-مۇحاممەدتىڭ «وشپەس ەرلىك» اتتى ماقالاسى جارىق كوردى.
ماقالانىڭ ورىسشا نۇسقاسى «كازاحستانسكايا پراۆدا» گازەتىندە دە جاريالاندى. وسى ەڭبەكتە II دۇنيەجۇزىلىك سوعىس كەزىندە قايسارلىعىمەن تانىلىپ، 289 نەمىستى جەر جاستاندىرعان، ءوزى دە سول كەسكىلەسكەن ۇرىستا قازا تاپقان داڭقتى سۇرمەرگەن ىبىرايىم سۇلەيمەنوۆتىڭ ەرلىگى باياندالادى. ىبىرايىم سۇلەيمەنوۆ - قازىرگى جامبىل وبلىسىنىڭ تۋماسى.
ماقالادا ايتىلعانداي، ول 1941 -جىلى اسكەرگە شاقىرىلىپ، الماتىداعى 100-اتقىشتار بريگاداسىنا كەلىپ قوسىلادى. ال 1942 -جىلدىڭ تامىزىندا ماسكەۋ اسكەري وكرۋگىنىڭ قاراماعىنا كەلىپ، وسى جىلدىڭ قازان ايىندا كالينين مايدانىنىڭ قۇرامىندا سوعىسقا ارالاسادى.
قۇرالايدى كوزگە اتقان مەرگەن اتامىز II جاھان سوعىسى تاريحىنداعى ءۇش ۇلكەن اسكەري وپەراتسياعا - «مارس» دەپ اتالاتىن رجيەۆ، سىچيەۆكا باعىتىنداعى شابۋىلعا، ۆەليكيە لۋكي قالاسىن ازات ەتۋ جورىعىنا جانە نيەۆەل قالاسىن جاۋدان بوساتۋعا ارنالعان شايقاستارعا قاتىسىپتى. وسىنىڭ بارىندە عاجايىپ مەرگەندىگىمەن كوزگە ءتۇسىپ، ءۇش رەت قاتارىنان اسكەري ماراپاتقا ۇسىنىلادى. ونىڭ ەرلىگىن ۇلى وتان سوعىسىنىڭ داڭقتى قولباسشىلارى - كەڭەس وداعىنىڭ باتىرى، ارميا گەنەرالى ك. گاليتسكي، گەنەرال- لەيتەنانت ف. ليسيتسىن، گەنەرال-مايور ف. زۋيەۆ جانە گەنەرال-مايور ا. ليتۆينوۆ مويىندادى.
مويىنداپ قانا قويعان جوق، مەرگەندى قاتارىنان بىرنەشە رەت مارتەبەلى ماراپاتتارعا ۇسىنىپ، سوعىس اياقتالعاننان كەيىن جاريالاعان اسكەري مەمۋارلارىندا ونىڭ ەرلىگىن زور ريزاشىلىقپەن تامسانا جازادى. ءتىپتى قازاق جاۋىنگەرىنىڭ داڭقى شارىقتاپ، شىرقاۋ شىڭىنا جەتكەندە - 1943 -جىلدىڭ 9-شىلدەسىندە ىبىرايىم سۇلەيمەنوۆ كەڭەس وداعىنىڭ باتىرى اتاعىنا ۇسىنىلادى. بۇل قۇجاتقا ءۇش بىردەي ورىس گەنەرالى ك. گاليتسكي، ا. ليتۆينوۆ جانە ف. زۋيەۆ قول قويعان.
دەگەنمەن، ءتۇرلى سەبەپتەرمەن سۇلەيمەنوۆكە دەڭگەيى ءبىر دارەجەگە تومەن لەنين وردەنى عانا بەرىلەدى. ماقالادا وسىنداي دەرەكتەردىڭ ءبارى رەسەي فەدەراتسياسى قورعانىس مينيسترلىگىنىڭ ورتالىق اسكەري مۇراعاتىندا ساقتالىپ تۇرعان ناقتى مالىمەتتەرمەن دالەلدى تۇردە كەلتىرىلگەن. قۇجاتتاردىڭ سۋرەتتەرى دە قوسا بەرىلگەن.
سونداي-اق، وسى ماقالادا كەزىندە التىن جۇلدىز بۇيىرماعان ىبىرايىم سۇلەيمەنوۆكە تاۋەلسىز قازاق ەلىنىڭ «حالىق قاھارمانى» اتاعىن بەرۋ تۋرالى ماسەلە كوتەرىلگەن. «شىن مانىندە، بۇل - ابدەن قولداۋعا تۇرارلىق باستاما. وسى باستاما نازاردان تىس قالماي، ءتيىستى شەشىمدەر قابىلدانسا ەكەن دەگەن تىلەگىمىز بار» دەيدى سەناتور.
اۆتور: مارلان جيەمباي
