اسقار مامين ءوڭىر اكىمدەرىنە كوكتەمگى ەگىس جۇمىستارىن ساپالى جۇرگىزۋدى تاپسىردى

نۇر-سۇلتان. قازاقپارات - اۋىل شارۋاشىلىعى مينيسترلىگى مەن وڭىرلەر اكىمدەرىنىڭ الدىندا كوكتەمگى ەگىس جۇمىستارىن ساپالى جۇرگىزۋ مىندەت تۇر.

بۇل تۋرالى بۇگىن ۇكىمەت وتىرىسىندا ق ر پرەمەر-ءمينيسترى اسقار مامين ايتتى، دەپ حابارلايدى قازاقپارات ءتىلشىسى.

«كوكتەمگى ەگىس جۇمىستارىن ساپالى ءارى ۋاقتىلى جۇرگىزۋ ەلدىڭ ازىق-تۇلىك قاۋىپسىزدىگىن قامتاماسىز ەتۋدىڭ ماڭىزدى فاكتورلارىنىڭ ءبىرى بولىپ تابىلادى. بىلتىر پاندەمياعا قاراماستان ەگىس جۇمىستارى وتە جوعارى دەڭگەيدە جۇرگىزىلدى. اگروتەحنولوگيالار ءدال ساقتالىپ، تىڭايتقىشتار مەن وسىمدىكتەردى قورعاۋ قۇرالدارى ۋاقتىلى سالىندى. بۇل مول استىق جيناۋعا مۇمكىندىك بەردى»، - دەدى ۇكىمەت باسشىسى.

ونىڭ اتاپ وتۋىنشە، بيىل ۇكىمەت كوكتەمگى ەگىستى قارجىلاي جانە ماتەريالدىق-تەحنيكالىق قامتاماسىز ەتۋ بويىنشا بارلىق قاجەتتى شەشىمدەردى قابىلدادى. بيۋجەتتىك كرەديت بەرۋمەن قاتار بيىلعى جىلى اۋىل شارۋاشىلىعى ونىمدەرىن فورۆاردتىق ساتىپ الۋدى جۇزەگە اسىرۋ ءۇشىن بولىنگەن قاراجاتتىڭ كولەمى 24,5 ميلليارد تەڭگەدەن 45,3 ميلليارد تەڭگەگە دەيىن ارتتى.

«سوندىقتان وسى مەحانيزمدى پايدالانا وتىرىپ، الەۋمەتتىك ماڭىزى بار ازىق-تۇلىك تاۋارلارىن ساتىپ الۋعا ەرەكشە نازار اۋدارۋ كەرەك. جالپى اۋىل شارۋاشىلىعى مينيسترلىگى مەن وڭىرلەر اكىمدەرىنىڭ الدىندا بارلىق كوكتەمگى ەگىس جۇمىستارىن ساپالى جۇرگىزۋ بويىنشا ناقتى مىندەت تۇر. وسى ماسەلەنى ەرەكشە باقىلاۋدا ۇستاۋدى تاپسىرامىن. ەكولوگيا مينيسترلىگى اۋىل شارۋاشىلىعى مينيسترلىگىمەن جانە اكىمدىكتەرمەن بىرلەسىپ، رەسپۋبليكانىڭ وڭتۇستىك وڭىرلەرىندە، ونىڭ ىشىندە ۇزاق مەرزىمدى پەرسپەكتيۆادا سۋارمالى سۋمەن تۇراقتى قامتاماسىز ەتۋ بويىنشا شارالار قابىلداسىن»، - دەدى اسقار مامين.