ەرلان قارين پرەزيدەنتتىك زاڭ جوباسى بويىنشا جۇمىس قالاي ءجۇرىپ جاتقانىن ايتتى
«الەۋمەتتىك جەلىدە شەتەلدىكتەرگە جەر ساتۋ ماسەلەسى جەر كوميسسياسى اياسىندا قايتادان قاراستىرىلۋى مۇمكىن، بيلىك قايتا قاراستىرۋى ىقتيمال دەگەن سىندى پىكىرلەر كەيدە كەزدەسىپ قالادى. بۇل اڭگىمەلەردىڭ بارلىعى ناعىز جالعان مالىمەت ءارى سپەكۋلياتسيا. ماسەلەگە قاتىستى پىكىرتالاسقا نۇكتە قويىلعان. 12 -ناۋرىزدا پرەزيدەنت ءوزىنىڭ زاڭناماعا باستاماشىلىق قۇقىعىن پايدالانىپ، پارلامەنتكە شەتەلدىكتەرگە جەردى ساتۋعا جانە جالعا بەرۋگە تىيىم بەلگىلەيتىن ءتيىستى زاڭ جوباسىن جىبەرگەن. ونى دەپۋتاتتار ءوز جۇمىستارىنا بىردەن قابىلداپ، بەكىتىلگەن پروتسەدۋرا اياسىندا قاراستىرىپ تا جاتىر»، - دەپ جازدى ەرلان قارين Telegram پاراقشاسىندا.
ونىڭ اتاپ وتۋىنشە، اتالعان زاڭ زاڭ جوباسى بويىنشا ماجىلىستە جۇمىس توبى قۇرىلدى. توپ قۇرامىنا قوعام، مەملەكەتتىك ورگانداردىڭ، پارلامەنتتىك ەمەس پارتيالاردىڭ وكىلدەرى مەن ساراپشىلار كىردى. «18 - ناۋرىزدا، پارلامەنت قابىرعاسىندا جۇمىس توبىنىڭ ءبىرىنشى وتىرىسى ءوتتى. بۇگىن ءتۇس اۋا اتالعان توپتىڭ كەزەكتى وتىرىسى ءوتۋى ءتيىس. دەمەك، پروتسەسس تولىق قارقىنمەن ءجۇرىپ جاتىر. ال جەر كوميسسياسى وزگە ماسەلەنى، اۋىل شارۋاشىلىعى جەرلەرىن پايدالانۋ جايىن قارايدى»، - دەدى ق ر پرەزيدەنتىنىڭ كومەكشىسى.
اۆتور: مارلان جيەمباي
