قىزىلوردادا تۇراتىن ءۇندى قىزى: قازاق اندەرىن ورىنداۋدى ەرەكشە ۇناتامىن

قىزىلوردا. قازاقپارات - قىزىلوردا قالاسىنداعى نازاربايەۆ زياتكەرلىك مەكتەبىندە وقيتىن ءۇندى قىزى ايشاني داتتاترەيا قازاق اندەرىن ەرەكشە جاقسى كورەدى.

قازاقستاندا دۇنيەگە كەلگەن ول اباي ولەڭدەرىنە جازىلعان اندەردى ەرەكشە شابىتپەن شىرقايدى، دەپ حابارلايدى قازاقپارات ءتىلشىسى.

ءايشانيدىڭ مۋزىكاعا قىزىعۋشىلىعى ەرەكشە. كوپ جاعدايدا ورىس، ۋكراين، اعىلشىن، فرانتسۋز، حيندي جانە قازاق تىلىندەگى اندەردى ورىندايدى.

«ەڭ ۇنايتىنى - قازاق حالقىنىڭ اندەرى. ولار وتە اۋەندى جانە تەرەڭ ماعىناسى بار. جاقسى ىستەرگە، ومىرگە قۋانۋعا جانە ءبىر- ءبىرىمىزدى سىيلاۋعا شاقىرادى. ونى كوپشىلىككە ناسيحاتتاۋعا ءوز سەپتىگىمدى تيگىزگىم كەلەدى»، - دەيدى ايشاني. ونىڭ اكەسى - حالليمايسور داتتاترەيا ءۇندى ۇلتىنىڭ وكىلى.

اتا- اناسى الماتىدا ءبىر- ءبىرىن كەزىكتىرگەن. بۇگىندە قازاقستاندا 18 جىلدان استام ۋاقىت تاتۋ- ءتاتتى ءومىر ءسۇرىپ كەلەدى.

«قازاقتار - وتە كەڭ جۇرەكتى، باۋىرمال حالىق. ىنتىماعى جاراسقان ەلدىڭ ءبىر بولىگى بولعانىما قۋانامىن»، - دەپ ويىن ءبولىستى حالليمايسور داتتاترەيا.

بۇل وتباسىنداعى بارلىق ادام ونەرگە جاقىن. ۇلكەندەرى دە ۆوكالمەن اينالىسسا، بالالارى مۋزىكالىق اسپاپتا ويناۋدىڭ شەبەرى. دەگەنمەن داتتارەيا وتباسىنداعى باستى قاعيدا - بىلىمگە ەرەكشە دەن قويۋ. بۇگىندە ايشاني مەن اعاسى رادجيۆ وڭىردەگى زياتكەرلىك مەكتەپتىڭ وزات وقۋشىلارى. كەلەشەكتە ايشاني عىلىمنىڭ سىرىن اشىپ، اتاقتى بيولوگ عالىم بولۋدى ارماندايدى.