فۋتبولدان ءا چ: قازاقستان قۇراماسى الەم چەمپيونىمەن كۇش سىناسادى
ايتا كەتەيىك، قازاقستاندىق قۇراما ىرىكتەۋ ساتىسىندا D توبىندا سىنعا تۇسەدى. قارسىلاستارى - فرانتسيا، ۋكراينا، بوسنيا جانە گەرتسوگوۆينا، فينليانديا. قازاقستاندىق فۋتبولشىلار العاشقى تۋردا ەشكىممەن كەزدەسكەن جوق.
ال 24 -ناۋرىزدا ءوز الاڭىندا فرانتسيا ۋكراينامەن 1:1، فينليانديا بوسنيا جانە گەرتسوگوۆينامەن 2:2 ەسەبىمەن تەڭ وينادى. FIFA جاريالاعان سوڭعى رەيتينگتە فرانتسيا ەكىنشى ورىندا تۇر. ال قازاقستان وندا 122-ورىندا كەلەدى. الەم جانكۇيەرلەرىنە فرانتسيا قۇراماسى جاقسى تانىس. قاي كەزەڭدە دە بۇل ەلدىڭ فۋتبولشىلارى ءوزىن جاقسى قىرىنان تانىتىپ كەلەدى. قانشاما جۇلدىزدار جارقىراپ شىقتى. قازىر دە مۇنداي ساڭلاقتاردان كەندە ەمەس. كەزىندە ميشەل پلاتيني، جان تيگانا، زينەدين زيدان، فابەن بارتەز، تەرري انري، داۆيد ترەزەگە سەكىلدى ويىنشىلار جاسىل الاڭ تورىندە شەبەرلىگىمەن ءتانتى ەتتى. بۇگىندە ولاردىڭ ورنىن ۋگو لوريس، رافاەل ۆاران، پرەسنەل كيمپەمبە، پول پوگبا، وليۆە جيرۋ، انتۋان گريزمانن، كيليان مباپپە سەكىلدى جاستار باستى.
ايتا كەتەرلىگى، بۇگىنگى قارسىلاسىمىز تالاي الەمدىك جانە قۇرلىقتىق دودادا توپ جاردى. الەم چەمپيوناتىندا ەكى مارتە التىن (1998, 2018)، ءبىر كۇمىس (2006)، ەكى رەت قولا (1958، 1986) مەدال يەگەرى اتاندى. ال ەۋروپا چەمپيوناتىندا ەكى مارتە چەمپيون (1984, 2000)، ءبىر رەت ەكىنشى (2016)، ءبىر مارتە قولا (1996) جۇلدەگە قول سوزدى. وسىنىڭ ءوزى قۇرامانىڭ الەۋەتى قانداي ەكەنىن ايشىقتاي تۇسەدى.
ءبىزدىڭ فۋتبولشىلارعا فرانسيا ەۋروپادا كەزدەسىپ وتىرعان 38- قارسىلاسى اتانباق. ازىرگە قازاقستاندىقتار ولاردان وزگە بوسنيا مەن گەرتسەگوۆينا، گيبرالتار، يزرايل، يسپانيا، يتاليا، كوسوۆو، ليحتەنشتەين، ليۋكسەمبۋرگ، نورۆەگيا، سولتۇستىك يرلانديا، سولتۇستىك ماكەدونيا، سلوۆاكيا، سلوۆەنيا، ۋەلس جانە شۆەيتساريا قۇرامالارىمەن كۇش سىناسىپ كورگەن جوق.
ايتا كەتەرلىگى، بۇگىنگە دەيىن قازاق توپىراعىنا گەرمانيا، انگليا، پورتۋگاليا، نيدەرلاندى، بەلگيا سەكىلدى ماڭدايالدى قۇرامالار قادام باستى. ونىڭ ىشىندە 2008 -جىلعى ەۋروپا چەمپيوناتىنا ىرىكتەۋ ساتىسىندا قازاقستاندىق فۋتبولشىلار بەلگيامەن ەكى مارتە (0:0, 2:2) تەڭ تۇسكەنىن جانكۇيەرلەر ءالى كۇنگە دەيىن ۇمىتا قويعان جوق. وعان دەيىن ازيا قۇرلىعىندا دوپ تەپكەن قازاقستان UEFA قۇرامىنا 2002 -جىلى قابىلداندى. سودان بەرى الەم چەمپيوناتىندا 60 ويىن وتكىزگەن. ونىڭ ىشىندە 12 ىسىندە جەڭىسكە جەتىپ، 11 ىندە تەڭ تۇسسە، 37 ىسىندە قارسىلاسىنا ەسە جىبەردى. قازاقستان مەن فرانسيا قۇرامالارى اراسىنداعى كەزدەسۋ ەلوردا ۋاقىتىمەن 19.00 دە باستالىپ، «Qazsport» تەلەارناسىنان تىكەلەي ەفيردە كورسەتىلەدى.
اتالعان ويىندا بەلارۋستىك مامان الەكسەي كۋلباكوۆ باس تورەشى رەتىندە قىزمەت اتقارادى. وعان سول ەلدەن كەلگەن دميتريي جۋك پەن ولەگ ماسليانكو كومەكشى بولادى. قوسالقى تورەشى - ۆيكتور شيمۋسيك. سونداي- اق، بۇگىن D توبىندا ۋكراينا ءوز الاڭىندا فينليانديامەن شەبەرلىك بايقاسادى.
