ءتورتىنشى توقساندا قاي پاندەر قاشىقتان وقىتىلادى
بۇل تۋرالى ورتالىق كوممۋنيكتسيالار قىزمەتىندە وتكەن بريفينگىدە ايتىلدى، دەپ حابارلايدى قازاقپارات ءتىلشىسى.
« ІV توقسانداعى ەڭ باستى ماسەلە - سانيتارلىق تالاپتاردى قاتاڭ ساقتاۋ. بۇگىنگى كۇنى ءبىلىم باسقارمالارى، مەكتەپ اكىمشىلىگى، مەكتەپ باسشىلىعى بارلىق سانيتارلىق- ەپيدەميولوگيالىق تالاپتاردى ساقتاۋ نورمالارى بويىنشا جۇمىسىن جالعاستىرۋدا. سونىمەن قاتار، ءار وقۋشى، ءار پەداگوگ ءوزىنىڭ جەكە باس گيگيەناسىن ساقتاۋ ماسەلەسىن دە ۇمىتپاۋى كەرەك. مەكتەپتە ساباقتار قاتاڭ ءتارتىپتى ساقتاي وتىرىپ جالعاسادى»، - دەيدى ق ر ءبىلىم جانە عىلىم ۆيتسە-ءمينيسترى شولپان كارينوۆا.
ونىڭ ايتۋىنشا، اسحانالاردىڭ، مەكتەپ- ينتەرناتتاردىڭ جۇمىسى جەرگىلىكتى باس سانيتار دارىگەرلەردىڭ قاداعالاۋىمەن جالعاسا بەرەدى.
«اتا-انالارعا ايتقىم كەلەتىنى، ІV توقساندا مەكتەپ فورماسىن ساتىپ الۋدىڭ قاجەتى جوق. وقۋشىلار وزدەرىنە قولايلى، ۇقىپتى جانە تازا كيىم كيىپ، مەكتەپكە بارۋىنا رۇقسات ەتىلگەن. قاي ءپاننىڭ قالاي وتەتىنىن ءار مەكتەپ ءوز جاعدايىنا قاراي ىسكە اسىرادى. مينيسترلىك قاي پاندەردى قاشىقتان وقىتۋعا بولاتىنى تۋرالى ۇسىنىم جولدادى. وندا مۋزىكا، كوركەم ەڭبەك، قۇقىق نەگىزدەرى، گرافيكا جانە جوبالاۋ، كاسىپكەرلىك جانە بيزنەس نەگىزدەرى، ينفورماتيكا پاندەرىن قاشىقتان وقىتۋعا بولاتىنى كورسەتىلگەن. دەنە شىنىقتىرۋ ءپانى شتاتتىق فورماتتا تازا اۋادا جۇرگىزىلۋىنە رۇقسات ەتىلدى»، - دەيدى ول.
