ەلوردا تۇرعىندارىن جاپپاي ۆاكسينالاۋ قاشان باستالادى

نۇر-سۇلتان. قازاقپارات - ءساۋىر ايىنىڭ ەكىنشى جارتىسىندا نۇر-سۇلتان تۇرعىندارىن جاپپاي ۆاكسينالاۋ باستالادى.

بۇل تۋرالى نۇر-سۇلتان قالاسى قوعامدىق دەنساۋلىق ساقتاۋ باسقارماسىنىڭ باسشىسى تيمۋر مۇراتوۆ ايتىپ بەردى، دەپ حابارلايدى قازاقپارات ءتىلشىسى.

«ءساۋىردىڭ ەكىنشى جارتىسىندا حالىقتى جاپپاي ۆاكسينالاۋعا كىرىسۋدى جوسپارلاپ وتىرمىز. قازىرگى ۋاقىتتا حالىقتىڭ دەكرەتتەلگەن توبى ەكپە الىپ جاتىر: دارىگەرلەر، پەداگوگتار، شۇعىل قىزمەتتەر، الەۋمەتتىك مەكەمەلەردىڭ كونتينگەنتى. سونىمەن بىرگە ءبىز سوزىلمالى اۋرۋلارى بار ادامداردى ۆاكسينالاۋدى باستادىق. وسى تۇستا تۇسىنىسپەۋشىلىك تۋىنداپ، تۇتاس حالىقتى ۆاكسينالاۋ باستالىپ كەتتى دەپ ويلايتىندار بار ەكەن. ءيا، ءبىزدىڭ كەيبىر ەمحانالارىمىز ۆاكسينالاۋدى باستادى، ءبىراق بۇل سوزىلمالى اۋرۋلارى بار ادامدار عانا ءۇشىن، ءبىز مۇنى ەسكەرىپ، ولاردى ءبىرىنشى ۆاكسينالاۋعا تىرىسامىز»، - دەدى ت. مۇراتوۆ ەلوردا اكىمدىگىندە وتكەن ونلاين بريفينگتە.

سونىمەن بىرگە، باسقارما باسشىسى ۆاكسينالاۋدىڭ تەگىن جۇرگىزىلەتىنىن ەسكە سالدى.

«ءبىز ۆاكسينالاۋدى ۇيىمداسقان تۇردە جۇرگىزەمىز. ەمحانالار، ەگۋ كابينەتتەرى ارقىلى ءوزىمىز شاقىرۋعا تىرىسامىز، ءبىراق قاجەتتىلىك تۋىنداسا، موبيلدى توپتاردى قوعامدىق ورىندارعا جىبەرۋىمىز مۇمكىن. كۇن جىلىنعان سوڭ، بۇل نۇسقا قاراستىرىلادى»، - دەيدى ت. مۇراتوۆ.

بۇعان دەيىن تيمۋر مۇراتوۆ ەلورداداعى ەپيدەميولوگيالىق جاعدايدى شىلدە ايىنداعى اۋىر كەزەڭگە تەڭەگەن ەدى. كوروناۆيرۋس ينفەكسياسى ناۋقاستارىنىڭ ءوسىمى ناۋرىز مەيرامىنان كەيىن بايقالدى. استانالىق دارىگەرلەر مەن بارلىق مەديتسينالىق قىزمەتكەرلەر قايتادان ەكى ەسە جۇكتەمەدە جۇمىس ىستەپ جاتىر. ك ۆ ي- مەن كۇرەسۋ ءۇشىن 11 ستاتسيونار ۇيىمداستىرىلدى، ونىڭ ىشىندە 10 ينفەكسيالىق، ءبىر كارانتيندىك ستاتسيونار («Ramada Plaza» قوناق ءۇيى بازاسىندا) بار. قوسىمشا ءۇش ۇيىمنىڭ بازاسىندا 300 ينفەكسيالىق توسەك-ورىن اشىلۋى مۇمكىن.

اۆتور: ايجان سەرىكجان قىزى