تەمىر جولدى كەسىپ وتپەك بولعان پاۆلودارلىقتىڭ كولىگى پويىز كەلە جاتقاندا توقتاپ قالدى
«24-ناۋرىزدا الەۋمەتتىك جەلىلەردى مونيتورينگىلەۋ كەزىندە kolesa_pavlodar پاراقشاسىندا پويىز ماشينيسىنىڭ شۇعىل توقتاۋعا ءماجبۇر بولعانى جايلى بەينەروليك جاريالاندى. سەبەبى پويىز جولىندا اۆتوكولىك تۇرىپ قالعان»، - دەدى پاۆلودار وبلىسى پوليتسيا دەپارتامەنتى باستىعىنىڭ ءبىرىنشى ورىنباسارى جاسقايرات قايىروۆ.
ونىڭ ايتۋىنشا، بۇل فاكتى پاۆلودار وبلىسى شارباقتى اۋدانىنىڭ پوليتسيا بولىمىندە تىركەلگەن جانە ول بويىنشا تەكسەرىس جاسالعان.
«19-ناۋرىزدا شارباقتى اۋدانى الەكسەيەۆكا اۋىلىنداعى تەمىر جولدىڭ 544-شاقىرىمىندا Toyota Camry اۆتوكولىگىنىڭ جۇرگىزۋشىسى جول ءجۇرۋ ەرەجەسىن ورەسكەل بۇزىپ، باعدارشامنىڭ تىيىم سالاتىن سيگنالىنا قاراماستان وتە شىقپاق بولعان. جۇرگىزۋشى وتۋگە ۇلگەرەمىن دەپ ويلاعان، ءبىراق ءدال وتكەلدە كولىك توقتاپ قالدى»، - دەيدى جاسقايرات قايىروۆ.
وبلىستىق پوليتسيا دەپارتامەنتى باسپا ءسوز قىزمەتىنىڭ مالىمەتىنشە، جۇرگىزۋشى - شارباقتى اۋدانىنىڭ 38 جاستاعى تۇرعىنى. وعان جول ەرەجەسىن بۇزعانى ءۇشىن ق ر ا ق ب ت ك 607-بابىنىڭ 1-بولىگى بويىنشا ون ايلىق ەسەپتىك كورسەتكىش - 29170 تەڭگە مولشەرىندە ايىپپۇل سالىندى.
اۆتور: گۇلزات اقجولوۆا
