مال شارۋاشىلىعىمەن اينالىساتىن ءار قازاققا جەر بەرىلۋى كەرەك - الماسبەك سادىربايەۆ

تالدىقورعان. قازاقپارات - اسىل تۇقىمدى قوي وسىرەتىن الماسبەك سادىربايەۆ مال شارۋاشىلىعىمەن اينالىساتىن قوجالىق يەلەرىنە جەر بەرىلۋ كەرەك دەپ سانايدى.

سەبەبى، قازىر اۋىل حالقىندا جەر بولماعاندىقتان، جاستار قالاعا كوشىپ، بازار جاعالاپ ءجۇر، - دەپ حابارلايدى قازاقپارات ءتىلشىسى.

«قانشاما جاستار قازىر قالاعا بارىپ، بازاردا اربا سۇيرەتىپ ءجۇر. سەبەبى، اۋىلدا جۇمىس جوق. ال قوجالىق يەلەرىنە جەر بەرسە، مالىن ءوسىرىپ، تىرشىلىگىن جاسايتىن ەدى، كاسىبىن دامىتاتىن ەدى. بىزدە ۇرپاقتار ساباقتاستىعى دەگەن جوق. مىسالى، قوجالىق يەسىنە جەر بەرىلسە، ول مالىن، جەرىن، ەرتەڭ ۇرپاعىنا بەرەدى. سولاي ءبىز شارۋاشىلىعىمىزدى دامىتامىز. مىنا ۇلان عايىر جەرىمىز، بوس جاتپايتىن ەدى، يگەرىلەتىن ەدى»، - دەدى «شوپان اتا» قوي وسىرۋشىلەر قاۋىمداستىعىنىڭ ءتوراعاسى الماسبەك سادىربايەۆ.

الماسبەك سادىربايەۆ جەر كوميسسياسىنىڭ مۇشەسى. بۇگىنگى وتىرىسقا قاتىستى. ول 17 جىلدان بەرى شوپان اتا ءتولىن اسىلداندىرۋمەن اينالىسىپ كەلە جاتقان ازامات. بۇگىندە قويدىڭ باسىن 3 مىڭعا جەتكىزگەن. اسىل تۇقىمدى قوشقار مەن قويدان ءبىر مەزەتتە 5-7 ەمبريون الىپ، اسىل تۇقىمدى ەمەس قويعا سالۋ ارقىلى ۋاقىت ۇنەمدەۋ مۇمكىندىگىن، مال جايۋدىڭ ءتيىمدى ءادىسىن ەلىمىزدە العاشقىلاردىڭ ءبىرى بولىپ يگەرگەن الماسبەك سادىربايەۆ. ءبىراق ول وزىندە جەر جوق ەكەنىن ايتادى.

«مەن قويىمدى قازىر بىرەۋگە باقتىرىپ وتىرمىن. سەبەبى، مەندە جەر جوق. ءار قوجالىق يەسىنە 500 گەكتاردان جەر بەرسە، شارۋاشىلىق داميتىن ەدى. مىسالى مەندە باستاپقىدا جەر بولدى. ءبىراق وتە كىشكەنتاي. مەن بالالارىمنىڭ اۋزىنان جىرىپ سالعان قوجالىعىمدى تاستاپ، كەڭ جەر ىزدەۋگە كەتتىم. سەبەبى، مالدى سىيدىرۋ كەرەك. بۇگىندە قويدىڭ باسى 3 مىڭعا جاقىنداپ قالدى. سوندىقتان اۋىل شارۋاشىلىعىن دامىتامىز دەسەك، شارۋالارعا جەر بەرىپ، قولداۋ كەرەك»، - دەدى الماسبەك سادىربايەۆ.

اۆتور: سامال قابىشەۆا