قازاقشا كونتەنت ساپاسىن اعىلشىن ءتىلىنىڭ بازاسىندا كوتەرۋ كەرەك - ۋيكيپەديا اكىمشىسى

نۇر-سۇلتان. قازاقپارات - «ينتەرنەت دامىعان سايىن اعىلشىن ءتىلىنىڭ اياسى كەڭەيىپ، وزگە تىلدەر ىعىسىپ بارادى. بۇدان قورقۋدىڭ قاجەتى جوق».

بۇل - قازاقشا ۋيكيپەديانىڭ ساپاسىن كوتەرۋگە زور ۇلەس قوسقان شۆەيتساريالىق قانداسىمىز رۋسلان توقبولاتتىڭ پىكىرى، دەپ حابارلايدى قازاقپارات.

شۆەيتسارياداعى قازاقتاردىڭ باسىن قوسىپ، BIRLIK قازاق-شۆەيتسار قاۋىمداستىعىن قۇرۋعا اتسالىسقان قانداسىمىز رۋسلان توقبولاتتى كوپشىلىك قازاق ۋيكيپەدياسىنىڭ اكىمشىسى رەتىندە كوبىرەك تانيدى. 2013 -جىلى ول اتالمىش رەسۋرسقا اكىمشى بولىپ تۇرعاندا قازاق تىلىندەگى عىلىمي ماقالالاردىڭ سانى 200 مىڭنان اسقان بولاتىن. قازىر سول قارقىن نەگە توقتاپ قالعانىن سۇراۋ ءۇشىن شۆەيتسارياداعى قانداسىمىزعا حابارلاسىپ كوردىك.

«ۋيكيپەديا دەگەن ەرىكتىلەردىڭ جۇمىسى عوي. قولدانۋشىلار ءوز ەركىمەن، قابىلەتىنىڭ جەتكەنىنشە ماقالالاردى وڭدەيدى. قازاقستاندىقتاردىڭ كوبى ورىس، اعىلشىن ءتىلىن بىلگەندىكتەن، ولارعا سول تىلدەردە اقپارات الۋ وڭايىراق بولعاندىقتان قازاق ۋيكيپەدياسى ونداي قاتتى دامىماي جاتقان شىعار. ويتكەنى، اقپارتتاردىڭ بارلىعىن باسقا تىلدەردە تابۋعا بولادى. ال قازاقشا ۋيكيپەدياعا اتسالىسۋشىلار پاتريوتتىق سەزىمنىڭ جەتەگىمەن قولىنان كەلگەن ۇلەسىن قوسىپ ءجۇر»، - دەيدى قانداسىمىز.

دەگەنمەن، بۇل ىسكە ەرىكتىلەردىڭ مىندەتى رەتىندە بەيجاي قاراماي، پايدالى جۇمىس تىندىرىپ جۇرگەندەرگە قولپاشتاۋ كورسەتكەن ارتىق بولماس دەگەن وي ايتتى.

«ۋيكيپەديا ەرىكتىلەردىڭ جوباسى دەسەك تە، ەڭبەك ءونىمدى بولۋ ءۇشىن ادامدى قولداپ، قولپاشتاپ تۇرۋ كەرەك. سوسىن قاتىسۋشىلاردىڭ ىشىندە اۋىزبىرلىك بولۋى كەرەك. ادامدار كوبىنەسە ءبىر-ءبىرىن تاني قويمايدى. تەك سىرتتاي ءبىر-ءبىرىنىڭ جۇمىسىن كورىپ، ءبىلىپ وتىرادى. اراسىندا تىعىز ارالاساتىندار دا بار. ءبىراق سيرەك. ماقالالاردىڭ سانى وسپەي تۇرۋىنا وسى بىرلىكتىڭ جوقتىعى سەبەپ شىعار. ورتاق ءبىر ۇيىم بولسا، وسى ىسكە قىزىعۋشىلاردىڭ باسىن قوسسا، كەم دەگەندە جىلىنا ءبىر رەت جيناپ، نەگىزگى پروبلەمالاردى تالقىلاپ، جوسپارلى ءتۇردى ءىس-شارالار جاسايتىن بولسا، مۇمكىن بەلسەندىلىك ارتاتىن شىعار. ءوز باسىم ۋيكيپەدياعا كىرمەگەلى كوپ بولدى. ويتكەنى جۇمىس بابىمەن باسقا دا قوعامدىق جۇمىستاردان ۋاقىت ارتىلماي جاتىر. سوندىقتان دا قازىر، وكىنىشكە قاراي، بۇرىنعىداي كوپ كوڭىل بولۋگە قول تيمەي ءجۇر» - دەگەن رۋسلان توقبولات قازاق ءتىلدى ورتانىڭ ءبىلىمىن كوتەرۋ ءۇشىن ەكى اراعا ورىس ءتىلىن دەلدال قىلۋ ادەتىنەن ارىلۋىمىز كەرەك دەپ وتىر.

«ينتەرنەتتەگى كونتەنت ساپاسى تەك قازاق ءتىلىنىڭ عانا پروبلەماسى ەمەس. مىسالى، نەمىس ءتىلدى ايماقتاردا دا ءبىلىم قازىر كوبىنەسە اعىلشىن تىلىندە الىنادى. ويتكەنى كوپتەگەن جاڭالىقتاردى، الەمدىك زەرتتەۋ ناتيجەلەرىن اعىلشىنشا تابۋ وڭاي. ادامداردىڭ كوبى اعىلشىنشا بىلگەندىكتەن سول تىلدە اقپاراتتى الا سالادى. كاسىبي دەڭگەيدە دە اقپارات كوبىنەسە اعىلشىن تىلدە الىنىپ جاتىر. عالامدىق تەندەنتسيا سوعان قاراي بەت الۋدا. مەنىڭ ويىمشا، جاھاندانۋ ماسەلەسى قازاق تىلىنە عانا ەمەس، باسقا دا تىلدەرگە اسەرىن تيگىزىپ جاتىر. ودان قاتتى قورقۋدىڭ قاجەتى جوق. دەگەنمەن دە اعىلشىن تىلىنە كوپ كوڭىل بولگەن ءجون. ويتكەنى بۇل تىلدە ءبىلىم تۋىندايدى، ءبىلىم قورى جينالادى، جىلدان-جىلعا بازاسى نىعايىپ جاتىر. ياعني، اعىلشىن تىلىنە كوبىرەك كوڭىل بولگەن ءجون. ال قازاق ءتىلىنىڭ ينتەرنەتتەگى جاعدايى اقىرىنداپ داميتىنى انىق. وعان قاجەتتىلىك بولعان كەزدە ۇسىنىس تا بولادى. قازاق تىلىندە قىزىقتى كونتەنتتەر كوبەيسە، دامۋ مۇمكىندىگى بار. ءبىر ەسكەرەتىن جايت، جاھاندىق ۇلكەن پروتسەستەرمەن ارپالىسۋدىڭ قاجەتى جوق دەپ ويلايمىن. ويتكەنى بۇل زاڭدى، تابيعي پروتسەسس. كەرىسىنشە، قاسارىسپاي، اعىلشىن تىلىنە ورتا اشا وتىرىپ، قازاقشا كونتەنتتى سونىڭ بازاسىندا دامىتقان دۇرىس دەپ ويلايمىن»، - دەدى BIRLIK قازاق-شۆەيتسار قاۋىمداستىعىنىڭ تەڭ ءتوراعاسى.

اۆتور: ەسىمجان ناقتىباي