شىنجاڭدا كۇيشىلەردىڭ شىعارماشىلىق بايقاۋى وتەدى - شەتەلدەگى قازاق ءتىلدى ب ا ق- قا شولۋ

نۇر- سۇلتان. قازاقپارات- «قازاقپارات» ح ا ا شەتەلدەگى قازاق تىلىندە تارايتىن اقپارات كوزدەرىنە اپتالىق شولۋىن ۇسىنادى.

قىتايدا «شىنجاڭ قازاق مادەنيەت قوعامى» قازىرگى زامان كۇيشىلەرىنىڭ شىعارماشىلىق بايقاۋىن وتكىزبەك، دەپ جازادى قىتايلىق kazakcnr.com سايتى.

اتالعان ب ا ق- تىڭ جازۋىنشا، ءداستۇرلى ونەرىمىزدى ۇلىقتاعان بايقاۋ شىنجاڭ قازاق مادەنيەت قوعامىنىڭ WeChat جەلىسىندەگى «جەتى بوياۋ» اتتى پاراقشادا ونلايىن فورماتتا وتەدى.

«بايقاۋ شارتتارى بويىنشا، كونكۋرسقا 2001 -جىلدان بەرگى ۋاقىتتا جارىققا شىققان اۆتورلاردىڭ ءتول تۋىندى كۇيلەرى قاتىستىرىلادى. ءار قاتىسۋشى تەك ءبىر عانا تۋىندىسىن اۆتوردىڭ ءوزىنىڭ ورىنداۋىندا نەمەسە باسقا ادامنىڭ ورىنداۋىمەن جىبەرۋىنە بولادى. سونداي- اق، كۇيلەردىڭ wafe نەمەسە ۆيدەو نۇسقاسى مەن 5- سىزىقتى نوتاسى بىرگە جولدانادى. شىعارمانىڭ اتاۋى، شىعۋ تاريحى، بۇرىن ماراپاتتالعان جەتىستىگى ەسكەرتىلۋ ءتيىس. سونىمەن بىرگە، تۋىندى اۆتورىنىڭ اتى- ءجونىن، قىسقاشا ءومىربايانى جازلادى. بايقاۋعا وتىنىشتەر 2021 -جىلدىڭ 10- ماۋسىمىنا دەيىن قابىلدانادى. ال، بايقاۋ ءوز مارەسىنە جەتكەننەن سوڭ ۇزدىك تۋىندىلار ماراپپاتتالىپ، اتالعان شاراعا دەمەۋشى بولىپ وتىرعان بەيجىڭدەگى قازاق راديوسىنىڭ «ءان- دومبىرا» باعدارلاماسىندا سارالانعان تۋىندىلار جاريالانىپ، سارىنى بولەك كۇيلەردىڭ شىعۋ تاريحى اڭگىمەلەنىپ، اۆتولارمەن وتكىزىلگەن سىر- سۇحباتى بەرىلەدى. وسىلايشا بۇل تۋىندىلار راديونىڭ جانە «شىنجاڭ قازاق مادەنيەتى قوعامىنىڭ» التىن قورىندا ساقتالاتىن بولادى»، - دەپ جازادى CNR.

موڭعوليا پارلامەنتىنىڭ دەپۋتاتى اۋباكىر تىلەۋحان ۇلى ۇزدىك تۇلەكتەرگە ستيپەنديا بەرەدى - KAZNEWS

موڭعوليا پارلامەنتىنىڭ دەپۋتاتى اۋباكىر تىلەۋحان ۇلى موڭعوليانىڭ ۇ ب ت (ە ە ش) سىناعىنان ەڭ جوعارعى ۇپاي جيناعان 6 وقۋشىعا 1 ميلليون توگروگ ستيپەنديا ۇسىنادى، دەپ جازادى موڭعوليالىق Kaznews اقپاراتتىق پورتالى.

اتالعان ب ا ق- تىڭ جازۋىنشا، موڭعوليا پارلامەنتىنىڭ مۇشەسى اۋباكىر تىلەۋحان ۇلىنىڭ باستاماسىمەن بايان- ولگەي ايماعىنىڭ جالپى ءبىلىم بەرەتىن مەكتەپتەردىڭ 12- سىنىپ وقۋشىلارىنىڭ ۇلتتىق ءبىرىڭعاي تەستىلەۋ سىناعىنا ونلاين دايىندىعىن جاقسارتۋ ءۇشىن ELAB Education Academy ورتالىعىنىڭ كومەگىنە جۇگىنگەن.

«بيىل ايماعىمىزدا 12- سىنىپتى 1680 وقۋشى بىتىرەدى. كوۆيد-19 پاندەمياسىنا بايلانىستى ۇ ب ت - عا ارنالعان وقىتۋلار شەكتەۋلى بولىپ تۇرعانى بەلگىلى. بۇل جوبا ارقىلى قاشىقتىقتان موڭعوليانىڭ ۇزدىك 150 - گە جۋىق ۇستازىنان ءتالىم الۋعا بولادى. بۇل وقۋ ءۇردىسى ماۋسىمنىڭ 28 - كۇنىنە دەيىن جالعاسادى. وسى بارىستا ماتەماتيكا، مونعول ءتىلى، فيزيكا، حيميا، قوعامتانۋ، اعىلشىن ءتىلى پاندەرىنەن دايىندىق جۇمىسى جۇرگىزىلەدى. سونداي اق، اۋباكىر تىلەۋحان ۇلى 12- سىنىپتى تابىستى اياقتاپ، موڭعوليانىڭ ۇ ب ت (ە ە ش) سىناعىنان جوعارعى ۇپاي جيناپ، ايماقتا كوشباستاعان 6 وقۋشىعا 1 ميلليون توگروگتەن سپتيپەنديا، ۇزدىك 6 ۇستازعا نوۋتبۋك بەرەتىنىن حابارلادى. دەپۋتات الداعى ۋاقىتتا ءبىلىم سالاسى، سونىڭ ىشىندە بايان- ولگەي ايماعىنىڭ ءبىلىم ساپاسىن جاقسارتۋ، ۇستازداردىڭ بىلىكتىلىگىن ارتتىرۋ قاتارلى شارۋالارعا ات سالىساتىنىن مالىمدەدى»، - دەپ جازادى Kaznews پورتالى.

ناۋرىز مەيرامىنا وراي قازاق ءتىلدى راديولاردىڭ ونلاين باسقوسۋى ءوتتى – فارس

17 - ناۋرىزدا قازاق راديوسىنىڭ ۇيىمداستىرۋىمەن وتكەن قازاق ءتىلدى راديولاردىڭ ونلاين جينالىسىنا يران تەلەراديو بىرلەستىگى الەمدىك قىزمەت تورابىنىڭ كاۆكاز جانە ورتا ازيا دەپارتامەنتىنىڭ باسشىسى بورحان حەشماتي جانە Pars Today Kazakh سايتى وكىلى قاتىستى، دەپ حابارلايدى يراننىڭ Parstoday اقپارات اگەنتتىگى.

اتالعان ب ا ق- تىڭ جازۋىنشا، ونالايىن جۇزدەسۋ ناۋرىز مەيرامىنا وراي قازاقستان، يران، تۇركيا، موڭعوليا، قىرعىزستان، وزبەكستان جانە رەسەيدىڭ تاتارستان اۆتونومدى رەسپۋبليكاسىنداعى قازاقءتىلدى راديولاردىڭ قاتىسۋىمەن وتكەن. يران تەلەراديو بىرلەستىگى الەمدىك قىزمەت تورابىنىڭ كاۆكاز جانە ورتا ازيا دەپارتامەنتىنىڭ باسشىسى بورحان حەشماتي وسى باسقوسۋدا قازاقستان حالقىن ناۋرىز مەيرامىمەن جانە قازاق راديوسىنىڭ 100 جىلدىق مەرەيتويىمەن قۇتتىقتاعان.

«قازاق راديوسىنىڭ 100 جىلدىق مەرەيتويىنىڭ ناۋرىزبەن تۇسپا- تۇس كەلۋىن جاقسى ىرىمعا بالايمىز. وسى ءىس- شارانىڭ ارقاسىندا قازاقستان ۇلتتىق راديوسى مەن يراننىڭ قازاق راديوسى جانە Pars Today Kazakh سايتى اراسىندا بايلانىس ورناپ، سىندارلى ارىپتەستىككە قولايلى جاعداي جاسالىپ، قازاقستان ۇلتتىق راديوسىنىڭ 100 جىلدىق مەرەيتويىنىڭ ءبىز ءۇشىن دە، سىزدەرگە دە ەستە قالارلىق وقيعاعا اينالاتىنىنا ۇمىتتەنەمىز»، - دەدى بورحان حەشماتي.

سونداي- اق، يران تەلەراديو بىرلەستىگى الەمدىك قىزمەت تورابىنىڭ قازاق راديوسىنىڭ ديكتورى ءارى اۋدارماشىسى گاۋحار ومارحانوۆادا وسى جينالىستا ءوز پىكىرىمەن بولىسكەن.

«يران تەلەراديو بىرلەستىگى الەمدىك قىزمەت تورابىنىڭ قازاق راديوسى 1995 -جىلى قۇرىلعان. قازاقستانمەن قوسا، وزبەكستان جانە قىرعىزستاندى قامتيتىن راديو يران مەن الەمنىڭ جاڭالىقتارى، ساراپتاما، ساياسي- ەكونوميكالىق، مادەني- الەۋمەتتىك جانە ءدىني- تانىمدىق تاقىرىپتارداعى باعدارلامالاردى كۇندە 30 مينۋت ساعات 17:20-17:50 ارالىعىندا تاراتادى. 30 مينۋتتىق ەفير كۇنىنە ءبىر رەت قايتالانىپ وتىرادى. قازاق راديوسىنىڭ كورنەكتى باعدارلامالارى قاتارىندا «نۇرلى جول»، «يراننىڭ تانىمال تۇلعالارى»، «باتىستىڭ ءومىر سالتى»، «يمام حومەيني مەكتەبىندە»، «يراننىڭ تۋريستىك تارتىمدىلىقتارى»، «پارسى ءتىلىن ۇيرەنەيىك» باعدارلامالارى بار. سونداي- اق ايتۋلى كۇندەر مەن ءدىني مەرەكەلەرگە وراي دايىندالاتىن ارنايى باعدارلامالار دا تىڭدارمانداردىڭ ەرەكشە قولداۋىنا يە»، - دەپ جازادى Parstoday اگەنتتىگى.

موڭعولياداعى ق ر- نىڭ ەلشىسى ناۋرىز مەرەكەسىنە وراي قۇتتىقتاۋ جولدادى - KAZNEWS

قازاقستان رەسپۋبليكاسىنىڭ موڭعولياداعى توتەنشە جانە وكىلەتتى ەلشىسى جالعاس ادىلبايەۆ قازاق حالقىن ناۋرىز مەرەكەسىمەن قۇتتىقتادى، دەپ جازادى موڭعوليالىق Kaznews اقپاراتتىق پورتالى.

«قۇرمەتتى قانداستار! سىزدەردى ناۋرىز مەيرامىمەن قۇتتىقتايمىن! ءبىزدىڭ حالقىمىز ءۇشىن قاسيەتتى ناۋرىز مەيرامى كۇن مەن ءتۇننىڭ تەڭەلىپ، تابيعاتتىڭ قايتا جاڭعىراتىن ەرەكشە ساتىندە قازاق حالقىنىڭ ۇلىلىعىن دارىپتەي تۇسەتىن ۇلىستىڭ ۇلى كۇنى! بۇل كۇنى ءاز ناۋرىز مەيرامى تويلانىپ، شىعىس حالىقتارىنىڭ جاڭا جىلى باستالادى. اتا- بابالارىمىز ايتپاقشى، بۇل - اق تۇيەنىڭ قارنى جارىلعان كۇن، ىرىستى، ىنتىماقتى ۇلى توي كۇنى. ءبىزدىڭ بۇل مەرەكەمىز - قازاق حالقىنىڭ تاريحىنداعى ۇلكەن مەرەكە بولىپ تابىلادى. ۇلتىمىزدىڭ تاريحىندا عاسىرلار بويى تويلانىپ، جىلدان- جىلعا جالعاسىپ كەلە جاتقان ناۋرىز مەيرامى ءار ادامنىڭ جاڭا باستاماسىنىڭ جۇزەگە اسۋىنا ءۇمىت پەن سەنىم ۇيالاتادى. الەم تاريحىندا كوپ مەملەكەتتەر بۇل كۇندى جاڭا جىل دەپ سانايدى. «ۇلىس وڭ بولسىن، اق مول بولسىن!» دەپ تىلەك بىلدىرەتىن دوستىق پەن ىنتىماق مەرەكەسى كوشباسشىلىق مەرەيىمىزدى اسقاقتاتا ءتۇسسىن. ناۋرىز مەيرامى قۇتتى بولسىن! اق مول بولسىن!» - دەدى ق ر- نىڭ موڭعولياداعى توتەنشە جانە وكىلەتتى ەلشىسى جالعاس ادىلبايەۆ.

اتالعان ب ا ق- تىڭ دەرەگىنشە، ەكى ەل اراسىندا 1992 -جىلدىڭ 22 - قاڭتارىنان باستاپ ديپلوماتيالىق قارىم قاتىناس ورناتىلىپ، 1997 -جىلدىڭ مامىر ايىندا ۇلانباتىردا قازاقستان رەسپۋبليكاسىنىڭ ديپلوماتيالىق ميسسياسى اشىلدى. 2007 -جىلدىڭ قاڭتارىندا ديپلوماتيالىق ميسسيا ەلشىلىك بولىپ اۋىستى. ال، 1992 -جىلدىڭ قىركۇيەك ايىندا الماتى قالاسىندا موڭعوليانىڭ ەلشىلىگى اشىلعان.

تۇرىك كومپانياسى پەتروپاۆلدا اۋرۋحانا سالىپ جاتىر - TRT

سولتۇستىك قازاقستاننىڭ پەتروپاۆل قالاسىندا تۇرىك كومپانياسى حالىقارالىق ستاندارتتارعا ساي اۋرۋحانا سالىپ جاتىر، دەپ حابارلايدى تۇركيا راديو تەلەۆيزيا پورتالى.

«وبلىس اكىمى قۇمار اقساقالوۆ وسى جوبانىڭ ايماق ءۇشىن ماڭىزدى ەكەنىن اتاپ كورسەتتى. بازانىڭ قۇرىلىسىنىڭ قيىن شارتتارعا قاراماستان جالعاسىپ جاتقانىن ءبىلدىردى. ايىرىقشا جاڭا اۋرۋحانا تۇرىك ارىپتەستەرمەن بىرگە باسقارىلادى. وبلىس دارىگەرلەرى بيىلدان باستاپ تۇركيادا وقۋ- دايىندىعىنان وتەدى. 90 مىڭ شارشى مەترگە سالىناتىن اۋرۋحانا جوعارى تەحنولوگيالىق جابدىقتارمەن جابدىقتالادى. اۋرۋحانا قۇرىلىسى ەكى جىل بويى 500 ادامدى جۇمىسپەن قامتيدى. قۇرىلىس 2023 -جىلى اياقتالادى»، - دەپ جازادى TRT.

تاشكەنتتەن الماتىعا كۇن سايىن رەيستەر جۇزەگە اسىرىلادى - «ءوزا» اقپاراتتىق اگەنتتىگى

«Uzbekistan Airways» اۋە كومپانياسى الماتىعا تۇراقتى رەيستەر سانىن كوبەيتەدى. 2021 -جىلدىڭ 28 -ناۋرىزىنان باستاپ تاشكەنتتەن قازاقستاننىڭ الماتى قالاسىنا رەيستەر كۇن سايىن جۇزەگە اسىرىلاتىن بولادى، دەپ جازادى وزبەكستاننىڭ «ءوزا» مەملەكەتتىك اقپاراتتىق اگەنتتىگى.

«بۇدان بولەك، وزبەكستان اۋە نارىعىنداعى جەتەكشى كومپانيا 24، 28 جانە 31 -ناۋرىزدا تاشكەنت- مينسك- تاشكەنت قوسىمشا رەيستەرىن جولعا قويسا، 29- ناۋرىزدان باستاپ سامارقاند- ىستامبۇل باعىتىندا تۇراقتى رەيستەر اشىلادى جانە 30 -ناۋرىزدا تاشكەنت- تبيليسي- تاشكەنت باعىتىنداعى رەيستەر قالپىنا كەلتىرەتىنىن حابارلاعان»، - دەپ جازادى «ءوزا» اگەنتتىگى.

اۆتور: باقىتجول كاكەش