ناۋرىز كوجەگە قانداي جىلىك قوسىلادى - ۆيدەو

نۇر-سۇلتان. قازاقپارات - قازاق حالقى ناۋرىزدى بەرەكەنىڭ، مەرەكەنىڭ، قاراجەردىڭ يىگەن كۇنى، بار پەيىلدىڭ كەڭىگەن كۇنى ەسەپتەيدى.

قىتايداعى قانداستار اراسىندا ناۋرىز كوجەگە كارى جىلىك قوسۋ ءداستۇرى ساقتالعان. بۇل تۋرالى شىنجاڭ تەلەارناسىندا ءبىراز جىلدار جۋرناليست، رەجيسسەر بولىپ قىزمەت اتقارعان قازاق ءداستۇرلى مادەنيەتى تۋرالى 40 ءبولىمدى فيلمنىڭ اۆتورى قۋانىش ءىلياس ۇلى ايتادى.

«ناۋرىز» دەرەكتى فيلمىن ءتۇسىرۋ بارىسىندا قىتايداعى قانداستاردىڭ ناۋرىز كوجەنى جاساۋ ءداستۇرىن كونە كوز قاريالاردىڭ ايتۋىمەن تولىق كورسەتتىك. بۇل كۇنى بالالاردان قارتتارعا دەيىن ءبىر داستارقاندا قاتارلاسا وتىرىپ، «جاقسى اس قالعانشا، جامان قارىن جارىلسىن» دەپ ناۋرىز كوجەدەن تويا ىشەدى. شەجىرە، قيسا-داستان ايتىپ، كوڭىل كوتەرەدى. اق ساقالدى اتالار مەن اق سامايلى اجەلەر بەرەكەنىڭ ءسوزىن سويلەپ، جوق- جىتىك، قيىنشىلعى بار جاندارعا كومەكتەسۋگە ءناسيحاتتايدى»، دەيدى ول.

قاريالاردىڭ ايتۋىنا قاراعاندا، ناۋرىز كوجەگە كارى جىلىك قوسۋ- كارى جىلىك- ەل اماندىعى دەيتىن بابالار ىرىمنان بولسا كە كەرەك. سونىمەن بىرگە كارى جىلىك-مالدىڭ قول جىلىكتەرىنىڭ ىشىندەگى كادەلى جىلىك. جولى باس پەن جامباستان كەيىن تۇرادى. كارى جىلىك ۇسىنۋ، كوپ جاسا، عۇمىر جاسىڭ ۇزاق بولسىن، اتا- بابا ارۋاعى قولداپ، جاراتقان جار بولسىن دەگەن ىزگى تىلەكتى بىلدىرەدى. ناۋرىز كوجەگە قوسىلاتىندان سانى جۇپ بولماي، تاق بولعانى دۇرىس. بۇل تاتاتىن ءدام- تۇزىمىز شەكتى بولماسىن، مول بولسىن دەگەن اتامىز قازاقتىڭ باياعىدان كەلە جاتقان اق تىلەگى.

اۆتور: ريزابەك نۇسىپبەك ۇلى