تۇركىستان قالاسىنىڭ اۋەجايىنان العاشقى حالىقارالىق رەيس ورىندالدى - فوتو
بۇل تۋرالى قازاقپارات ق ر يندۋستريا جانە ينفراقۇرىلىمدىق دامۋ مينيسترلىگىنىڭ Telegram كانالىنا سىلتەمە جاساپ حابارلايدى.
تۇركىستان جانە ىستانبۇل قالالارى اراسىندا تۇراقتى اۋە قاتىناسى اپتاسىنا 2 رەيسپەن، جۇما جانە جەكسەنبى كۇندەرى ا-320 اۋە كەمەسىمەن ورىندالادى. كەيىننەن رەيستەر سانى اپتاسىنا 7-گە دەيىن (كۇن سايىن) كوبەيەدى. بيلەت قۇنى 39999 تەڭگەدەن باستالادى.
تۇركىستان - ىستانبۇل العاشقى رەيسىنە 176 بيلەت ساتىلدى (%98). العاشقى تۇراقتى رەيس ىسكە قوسىلعان ساتتەن باستاپ (2020 -جىلعى 1-جەلتوقسان) تۇركىستان قالاسى اۋەجايىنان 80 نەن استام رەيس ورىندالىپ، 23 مىڭعا جۋىق جولاۋشى تاسىمالداندى. رەيستەردىڭ ورتاشا كوممەرتسيالىق جۇكتەمەسى %85 قۇرادى. بۇگىنگى تاڭدا تۇركىستان قالاسى اۋەجايىنان نۇر-سۇلتان، الماتى، اتىراۋ قالالارىنا ىشكى رەيستەر ورىندالۋدا.
بيىل جىلدىڭ ەكىنشى توقسانىنان باستاپ تۇركى الەمىنىڭ رۋحاني ورتالىعى رەتىندە تۇركىستاندى 10 وبلىس ورتالىعىمەن (اقتاۋ، اقتوبە، اتىراۋ، قاراعاندى، كوكشەتاۋ، قوستاناي، پاۆلودار، پەتروپاۆل، تالدىقورعان، وسكەمەن) اپتاسىنا 53 رەيسپەن بايلانىستىرۋ جوسپارلانىپ وتىر.
تۇركىستان قالاسىنىڭ اۋەجايى شەت ەلدەردىڭ اۋە كومپانيالارىنىڭ ۇشۋى ءۇشىن «اشىق اسپان» رەجيمىنە ەنگىزىلگەن. بۇل ۇشۋ گەوگرافياسىن كەڭەيتۋ ءۇشىن اۋەجايدى تارتىمدى ەتەدى جانە شەتەلدىك تۋريستەردى كوپتەپ تارتۋعا ىقپال ەتەدى.
تۇركىستاننان نوۆوسيبيرسكىگە (ر ف)، بىشكەككە (قىرعىزستان)، تاشكەنتكە (وزبەكستان) جانە ت. ب. جاڭا رەيستەردى ىسكە قوسۋ جوسپاردا بار. رەيستەر سانيتارلىق - ەپيدەميولوگيالىق تالاپتاردى قاتاڭ ساقتاي وتىرىپ جانە اۋە كومپانياسىنىڭ سايتىندا جاريالانعان كەستەگە سايكەس ورىندالادى.
