قازاقستان جەمقورلىقپەن كۇرەستە ورتالىق ازيادا كوش باستاپ تۇر - يوردانيا ەلشىسى

نۇر-سۇلتان. قازاقپارات - ەلىمىزدە سىبايلاس جەمقورلىقتى بولدىرماۋ باعىتىندا قولعا الىنىپ جاتقان ءىس- شارالارعا شەت مەملەكەتتەر قىزىعۋشىلىق تانىتۋدا.

سونىڭ ءبىرى يوردانيا مەملەكەتى. قازاقستاننىڭ پاراقورلىقپەن كۇرەس جولىنداعى تاجىريبەسىنە قاتىستى يوردان حاشيميت كورولدىگىنىڭ قازاقستان رەسپۋبليكاسىنداعى توتەنشە جانە وكىلەتتى ەلشىسى يۋسۋف مۋستافا ابدەلعاني ءوز ويىن ءبىلدىردى، دەپ حابارلايدى قازاقپارات ءتىلشىسى. «قازاقستاننىڭ سىبايلاس جەمقورلىققا قارسى كۇرەس جۇمىستارىمەن ءبىز تانىسپىز. ونىڭ دالەلى حالىقارالىق رەيتينگتە قازاقستان 180 ەلدىڭ ىشىندە 99 ورىنعا يە بولدى. ياعني بۇرىنعىدان 9 پوزيتسياعا كوتەرىلگەن. سىبايلاس جەمقورلىقپەن كۇرەستە قازاقستاندى ورتالىق ازيا ەلدەرىنىڭ ىشىندە كوش باستاپ تۇر دەسەك بولادى. ءوز كەزەگىندە يوردانيا بۇل جاڭالىقتى قۋانا قابىلدايدى»، - دەدى يۋسۋف مۋستافا ابدەلعاني «Antikor» الاڭىندا ونلاين وتكەن باسپا ءسوز ءماسليحاتىندا. سۇحبات بارىسىندا بەلگىلى بولعانداي، قازاقستاندىق «Antikor» جوباسى يوردانيادا دا جۇزەگە اسىرىلىپ جاتىر.

«Antikor» وتە قاجەتتى جوبا. بىزدەگى ادالدىق جانە سىبايلاس جەمقورلىققا قارسى كۇرەس كوميتەتى وسى جوبامەن تانىسىپ، قىزىعۋشىلىق تانىتىپ وتىر. ياعني، ءوزارا تاجىريبە الماسۋ كوزدەلۋدە. قازاقستاندا سىبايلاس جەمقورلىقپەن كۇرەس زاڭناماسى جىل سايىن جەتىلدىرىلىپ وتىرادى. ءبىز بۇنى باق ارقىلى ەستىپ- ءبىلىپ وتىرامىز. سونىڭ ءبىرى سىزدەردە مەملەكەتتىك قىزمەتكەرلەرگە سىي- قۇرمەت كورسەتۋگە تىيىم سالىنعان. سىزدەردەگى تاعى ءبىر جاڭالىق، قول استىنداعى قىزمەتكەردىڭ جەمقورلىق ارەكەتى ءۇشىن باسشىنىڭ تىكەلەي جاۋاپ بەرۋى نەمەسە قىزمەتىنەن كەتۋى»، - دەيدى ول.

سونداي-اق، ەلشى جەمقورلىققا قارسى كۇرەستە پروفيلاكتيكالىق ءىس-شارالاردىڭ ماڭىزىنا توقتالا كەلە، الدىن الۋ شارالارىن مەكتەپتەن باستاۋ كەرەكتىگىن العا تارتتى.

اۆتور: ءالي يبرايەۆ