20:58, 17 - ناۋرىز 2021 | GMT +5
پاندەميا جاعدايىندا شەتەلدىك جۇلدىزداردىڭ كونسەرتىنە ساتىلعان بيلەت جارامدى ما؟
نۇر-سۇلتان. قازاقپارات - قازاقستاننىڭ مەملەكەتتىك باس سانيتار دارىگەرى ەرلان قياسوۆ شەتەلدىك جۇلدىزداردىڭ كونسەرتىنە بيلەت ساتۋ دەرەكتەرى ءجىتى تەكسەرىلەتىنىن ايتتى، دەپ حابارلايدى قازاقپارات ءتىلشىسى.
باسپا ءسوز كونفەرەنتسياسىندا ەرلان قياسوۆقا ەلىمىزدە كەي وڭىرلەردىڭ «قىزىل» جانە «سارى» ايماققا ەنگەنىنە قاراماستان ناۋرىز، ءساۋىر، مامىر ايلارىندا شەتەلدىك جۇلدىزداردىڭ قاتىسۋىمەن كونسەرتتەر وتكىزۋ جوسپارلانعانى تۋرالى ساۋال قويىلدى.
«بۇل دەرەكتەر بويىنشا بولەك تەكسەرۋ جۇرگىزەمىز. جالپى الساق، «جاسىل» ايماقتاعى وڭىرلەردە زالدىڭ %30 تولتىرىپ، «سارى» ايماقتاعى وڭىرلەردە زالدىڭ %20 تولتىرىپ كونسەرت وتكىزە بەرۋگە بولادى. ال اتالعان فاكتىلەر بويىنشا، ارينە، تولىق اقپارات الىپ، ءار فاكتى بويىنشا قانشالىقتى زاڭ بۇزىلعانىن، قانشالىقتى كەلىسىلگەن شارا ەكەنىن جەكە-جەكە انىقتايمىز. بيلەتتەر الماتى قالاسى «جاسىل» نەمەسە «سارى» ايماقتا بولعان كەزدە ساتىلعان بولۋى مۇمكىن. ءبىراق ءدال قازىر ونداي شارالار وتكىزۋگە تىيىم سالىنعان»، - دەدى ەرلان قياسوۆ.
