قانداستارىمىزدىڭ ازاماتتىق الۋ ماسەلەسى ءالى قيىندىقتان شىعا الماي كەلەدى - قازىبەك يسا

نۇر-سۇلتان. قازاقپارات - پارلامەنت ءماجىلىسىنىڭ جالپى وتىرىسىندا دەپۋتات قازىبەك يسا ەلىمىزدە دەموگرافيا جانە كوشى-قون جونىندەگى اگەنتتىكتى قۇرۋدى ۇسىندى، دەپ حابارلايدى قازاقپارات ءتىلشىسى.

«بيىل تاۋەلسىزدىك العانىنا 30 جىل تولاتىن قازاقستان ءۇشىن حالىق سانىنىڭ كوبەيۋىنىڭ ماڭىزى زور. ال باستى قاۋىپتەردىڭ ءبىرى دە وسى حالىق سانىنىڭ ازايۋىنان تۋىندايدى. ق ر پرەزيدەنتى ق. توقايەۆ «تاۋەلسىزدىك بارىنەن قىمبات» اتتى باعدارلامالىق ماقالاسىندا: «سوڭعى جىلداردا ءتۇرلى سەبەپتەرگە بايلانىستى باسەڭدەپ قالعان قانداستار كوشىن بارىنشا قولداپ، ولاردى سولتۇستىك جانە شىعىس وڭىرلەرگە ورنالاستىرۋدى جانداندىرامىز» دەپ اتاپ وتكەن بولاتىن. كەيبىر ساراپشىلاردىڭ مالىمەتىنشە، شەت ەلدەردە 7 ميلليونعا جۋىق قازاق تۇرادى. ولاردىڭ الداعى ۋاقىتتا اسسيميلياتسياعا ۇشىراۋ قاۋىپى وتە جوعارى. دەموگرافيالىق اسپەكتىدە قازاق ۇلتى ءۇشىن بۇل ۇلكەن الەۋەت بولىپ تابىلادى. قازىر قازاقستانعا قونىس اۋدارۋعا ىنتالى شەتەلدىك قازاقتاردىڭ سانى 1,5 ميلليون ادامعا جۋىقتايدى ەكەن. وسى ادامي رەسۋرستى ءبىز نەگە دۇرىس پايدالانبايمىز؟»، - دەپ توقتالدى ق. يسا ۇكىمەت باسشىسىنىڭ اتىنا جولدانعان ساۋالىندا.

ونىڭ ايتۋىنشا، سوڭعى جىلدارى كوشى-قون باياۋلاپ قالعان. بۇنىڭ بىردەن ءبىر سەبەبى كەزىندە كوشى-قوندى جانداندىرعان كوشى-قون اگەنتتىگىنىڭ جويىلىپ، ميگراتسيامەن اينالىسۋ بىرنەشە مينيسترلىككە، كۆوتاعا ۇسىنىس بەرۋ ءار وبلىس اكىمدىگىنە بەرىلگەنىنەن بولىپ تۇر.

«سوندىقتان بۇگىندە ءار مينيسترلىككە شاشىراپ كەتكەن باسقارمالاردى ءبىر ورگانعا جيناپ، دەموگرافيا جانە كوشى-قون جونىندەگى اگەنتتىكتى قايتا قۇرۋ كەرەك. ەكىنشىدەن، قانداستارىمىزدىڭ ازاماتتىق الۋ ماسەلەسى ءالى قيىندىقتان شىعا الماي كەلەدى. بىزدە ۇلتى قازاق قانداستار ءۇشىن كەرەك قۇجات سانىن بارىنشا شەكتەپ، بىردەن ازاماتتىق بەرىلەتىن بولۋى ءتيىس»، - دەدى قازىبەك يسا.

وسى ورايدا ول قانداستاردى اسىرەسە ەلدىڭ سولتۇستىگى مەن شىعىسىنا قونىستاندىرۋ كەرەكتىگىن، بۇل وڭىرلەردەگى اۋىلداردا بوس قالعان ۇيلەردىڭ باعاسى 200-500 مىڭ تەڭگە اراسىندا ەكەنىن ايتتى.

اۆتور: رۋسلان عابباسوۆ