شىعىس قازاقستان پوليتسەيلەرى ۇرلانعان ءبىر ءۇيىر جىلقىنى يەسىنە قايتاردى
ش ق و پوليتسيا دەپارتامەنتى باسپا ءسوز قىزمەتىنىڭ مالىمەتىنە سۇيەنسەك، جارما اۋداندىق پوليتسيا بولىمىنە كەلگەن بەلتەرەك اۋىلىنداعى شارۋا قوجالىعىنىڭ 27 جاستاعى باسشىسى قاڭتار ايىنىڭ ورتاسىندا ءبىر ءۇيىر جىلقىسىنىڭ جوعالىپ كەتكەندىگى تۋرالى ارىز جازعان. انىقتالعانداي، ەركىن جايىلىمنان 24 باس مال ۇرلانعان.
«ءتارتىپ ساقشىلارى جەدەل- ىزدەستىرۋ شارالارىن جۇرگىزدى. ناتيجەسىندە 15 كۇننىڭ ىشىندە ءبىر ءۇيىر جىلقى يەسىنە قايتارىلدى. مال يەسى ءوز كەزەگىندە پوليتسيا قىزمەتكەرلەرىنە العىسىن ءبىلدىردى»، - دەدى ش ق و پ د باستىعى ساعات ماديەۆ.
وسى رەتتە، دەپارتامەنت وكىلدەرى مال ۇرلىعىنىڭ نەگىزگى سەبەبى مالدارىن جايىلىمعا قاراۋسىز جىبەرەتىن يەلەرىنىڭ سالعىرتتىعى ەكەندىگىن اتاپ ءوتتى. يەسىز جايىلىپ جۇرگەن ءتورت تۇلىك بارىمتاشىلار ءۇشىن وڭاي ولجا. سونىمەن قاتار قاراۋسىز مال جول- كولىك وقيعالارىنا دا سەبەپشى بولىپ جاتادى.
اۆتور: تالعاتجان مۇحامەتبەك ۇلى
