ءبىلىم ءمينيسترى ج و و وقىتۋشىلارىنىڭ جالاقىسى تۋرالى ايتتى
بۇل تۋرالى ءبىلىم جانە عىلىم مينيسترلىگىنىڭ القا ماجىلىسىندە ۆەدومستۆو باسشىسى اسحات ايماعامبەتوۆ ايتتى، دەپ حابارلايدى قازاقپارات ءتىلشىسى.
«جوعارى جانە جوعارى وقۋدان كەيىنگى ءبىلىم بەرۋدە كادرلار دايارلاۋعا ارنالعان مەملەكەتتىك تاپسىرىس كولەمىنىڭ جىل سايىن ءوسۋى بايقالادى. وسىنىڭ الدىندا مەملەكەتتىك گرانتتىڭ قۇنى 340-440 مىڭ تەڭگە بولعان. الدىڭعى جىلى مەملەكەت باسشىنىڭ قولداۋىنىڭ ارقاسىندا وسى مەملەكەتتىك گرانتتىڭ كولەمىن 1 ميلليون تەڭگەگە دەيىن ۇلعايتتىق. بۇل ءوز كەزەگىندە ۋنيۆەرسيتەتتەرگە ماتەريالدىق- تەحنيكالىق جاعدايىن جاقسارتۋعا، سونداي-اق پەداگوگتاردىڭ، وقىتۋشىلاردىڭ جالاقىسىن كوتەرۋگە مۇمكىندىك بەردى. 2019 -جىلى قىركۇيەكتە مينيسترلىككە قاراستى ۋنيۆەرسيتەتتەر پەداگوگتارىنىڭ جالاقاسىن 20 پايىزعا كوتەرسە، 2020 -جىلى قىركۇيەك ايىندا تاعى 20 پايىزعا كوتەردى»، - دەدى ا. ايماعامبەتوۆ. وسى ورايدا مينيستر بۇل جۇمىستى ءالى دە جالعاستىرۋ قاجەتتىگىن ايتتى.
«بۇگىنگى كۇنى جوعارى وقۋ ورىندارى پەداگوگتارىنىڭ جالاقىسى وتە تومەن. مەكتەپتەرمەن، كوللەدجدەرمەن سالىستىرعان كۇننىڭ وزىندە بۇل كورسەتكىش باسەكەگە قابىلەتتى ەمەس. سوندىقتان بۇل جۇمىستى جالعاستىرۋ بارلىق رەكتوردىڭ الدىندا تۇرعان نەگىزگى جۇمىستاردىڭ ءبىرى»، - دەدى ۆەدومستۆو باسشىسى.
بۇدان بۇرىن حابارلانعانداي، وتكەن اپاتادا سەنات دەپۋتاتى اقىلبەك كۇرىشبايەۆ جوعارى وقۋ ورىندارىندا بىلىكتى مامانداردى دايارلاۋ ماسەلەسىنە قاتىستى ۇكىمەت باسشىسىنىڭ ورىنباسارى ەرالى توعجانوۆتىڭ اتىنا ساۋال جولدادى. سونىمەن قاتار سەناتور ج و و وقىتۋشىلارىنىڭ جالاقىسىن كوتەرۋگە قاتىستى ۇسىنىس ايتتى.
اۆتور: رۋسلان عابباسوۆ
