ق ر پرەزيدەنتىنىڭ جارلىعىمەن تۇركىستان وبلىسىندا ساۋران اۋدانى قۇرىلدى

نۇر-سۇلتان. قازاقپارات - تۇركىستان وبلىسىندا جاڭادان تاعى ءبىر اۋدان - ساۋران اۋدانى قۇرىلدى.

ق ر پرەزيدەنتى قاسىم-جومارت توقايەۆ ءتيىستى جارلىققا قول قويدى، دەپ حابارلايدى قازاقپارات اقورداعا سىلتەمە جاساپ.

ساۋران اۋدانىنىڭ اكىمشىلىك ورتالىعى - شورناق اۋىلى بولادى. كەنتاۋ قالاسىنىڭ قۇرامىنان شاعا، جاڭا يقان، ەسكى يقان، ءۇشقايىق، ياسسى، ورانعاي، قاراشىق، جۇينەك، بابايقورعان، شورناق، جىبەك جولى، مايدانتال اۋىلدىق وكرۋگتەرى شىعارىلىپ، ساۋران اۋدانىنا وتەدى.

جارلىقتىڭ تولىق ءماتىنىن ۇسىنامىز

* * *

تۇركىستان وبلىسىنىڭ اكىمشىلىك-اۋماقتىق قۇرىلىسىنداعى وزگەرىستەر تۋرالى

«قازاقستان رەسپۋبليكاسىنىڭ اكىمشىلىك-اۋماقتىق قۇرىلىسى تۋرالى» 1993-جىلعى 8- جەلتوقسانداعى قازاقستان رەسپۋبليكاسى زاڭىنىڭ 9-بابىنا سايكەس قاۋلى ەتەمىن:

1. تۇركىستان وبلىسىنىڭ قۇرامىندا اكىمشىلىك ورتالىعى شورناق اۋىلىندا ورنالاساتىن ساۋران اۋدانى اكىمشىلىك-اۋماقتىق بىرلىگى كەنتاۋ قالاسىنىڭ قۇرامىنان شاعا، جاڭا يقان، ەسكى يقان، ءۇشقايىق، ياسسى، ورانعاي، قاراشىق، جۇينەك، بابايقورعان، شورناق، جىبەك جولى، مايدانتال اۋىلدىق وكرۋگتەرىن ءبولۋ جولىمەن قۇرىلسىن.

2. قازاقستان رەسپۋبليكاسىنىڭ ۇكىمەتى وسى جارلىقتىڭ 1-تارماعىن ىسكە اسىرۋ جونىندە قاجەتتى شارالار قابىلداسىن.

3. وسى جارلىق العاشقى رەسمي جاريالانعان كۇنىنەن باستاپ قولدانىسقا ەنگىزىلەدى.

قازاقستان رەسپۋبليكاسىنىڭ پرەزيدەنتى ق. توقايەۆ

نۇر-سۇلتان،

اقوردا،

2021 -جىلعى 12 ناۋرىز

534№

ەسكە سالايىق، بيىلعى 19- اقپاندا حالىق الدىندا ەسەپ بەرگەن تۇركىستان وبلىسىنىڭ اكىمى ءومىرزاق شوكەيەۆ وڭىردە جاڭا - ساۋران اۋدانىن قۇرۋ تۋرالى ق ر پرەزيدەنتى قاسىم-جومارت توقايەۆقا ۇسىنىس بەرىلگەنىن ءمالىم ەتكەن ەدى. بۇل ۇسىنىستى ءوڭىر باسشىسى الدىمەن، وتكەن جىلدىڭ سوڭىندا كەنتاۋ قالاسى مەن ونىڭ اۋىلدىق وكرۋگتەرىنىڭ تۇرعىندارىنا ۇسىنعان بولاتىن.

جەرگىلىكتى حالىق ساۋران اۋدانىن قۇرۋ تۋرالى ءو. شوكەيەۆتىڭ باستاماسىن قۋانىشپەن قولدادى. كەنتاۋ قالاسى تۇركىستان قالاسىمەن قاتار بىردەي دامىتىلاتىنى جوسپارلانعان. سونداي-اق بيىلعى 14- ناۋرىزدا ق ر مادەنيەت جانە سپورت مينيسترلىگى مادەنيەت جانە ونەر ىستەرى دەپارتامەنتىنىڭ ديرەكتورى كۇمىس سەيىتوۆانىڭ توراعالىعىمەن عىلىمي-ادىستەمەلىك كەڭەستىڭ كەزەكتى وتىرىسى ءوتتى.

وندا كونە ساۋران قالاشىعىن دامىتۋ ماسەلەسى تالقىلاندى.