موڭعوليادا تۇيە ەگىز بوتا تاپتى

نۇر-سۇلتان. قازاقپارات - موڭعوليادا ەگىز بوتا دۇنيەگە كەلدى. مۇنداي جاعداي تابيعاتتا وتە سيرەك كەزدەسەدى، دەپ حابارلايدى قازاقپارات Mongolnow سايتىنا سىلتەمە جاساپ.

وتكەن عاسىردىڭ 50-جىلدارى موڭعوليا ەكى وركەشتى تۇيەلەر سانى جونىنەن الەمدە كوش باستاپ تۇردى. ول كەزدە ەلدە 900 مىڭ باس تۇيە بولعان.

جالپى ۇلتتىق مال ساناعىنىڭ سوڭعى دەرەكتەرىنە سۇيەنسەك، موڭعوليادا 2020-جىلدىڭ جەلتوقسانىندا 472,9 مىڭ تۇيە بار. موڭعوليادا گوۆ التاي ايماعىنىڭ شارعا اۋىلىنىڭ قىستاعىندا ب. نيامدورج دەگەن تۇيەشىنىڭ قوراسىندا 7- ناۋرىز كۇنى ەگىز بوتا تۋدى.

تۇيەنىڭ ەگىز ءتول تابۋى تابيعاتتا وتە سيرەك بولادى. تۇيە ەكى جىلدا ءبىر رەت تۋادى، بوتاسىن 13 اي كوتەرەدى. كوبىنەسە ءبىر بوتا عانا دۇنيەگە كەلەدى، ەگىز وتە سيرەك. موڭعوليادا ەگىز بوتا - جاقسى نىشان سانالادى. جەرگىلىكتى حالىق ونى جايلى ۋاقىتتىڭ باستالۋىنىڭ بەلگىسى دەپ قابىلدايدى.