بيىل وتپان تاۋدا امال مەرەكەسى وتپەيدى
بۇل تۋرالى ماڭعىستاۋ وبلىسىنىڭ قوعامدىق كوممۋنيكاتسيا ورتالىعىندا وتكەن بريفينگتە وبلىستىق مادەنيەت تىلدەردى دامىتۋ جانە ارحيۆ ءىسى باسقارماسىنىڭ باسشىسى ءپانيا سارمۋرزينا ءمالىم ەتتى، دەپ حابارلايدى قازاقپارات ءتىلشىسى.
ونىڭ ايتۋىنشا، ماڭعىستاۋ وبلىسىنىڭ باس مەملەكەتتىك سانيتار دارىگەرىنىڭ قاۋلىسىنا سايكەس، كارانتين تالاپتارىن ساقتاي وتىرىپ، شاعىن توپپەن رەسمي شارا وتكىزىلەدى. شاراعا سەگىز ارىس اداي ۇرپاقتارىنىڭ وكىلدەرى قاتىسادى.
«ەسكىشە جىل ساناۋدا امال مەرەكەسىنىڭ ايرىقشا ورنى بار. بۇل مەيرام جىل سايىن «وتپان» تاريحي- مادەني كەشەنىندە بىرلىكتىڭ وتىن جاعۋمەن وتكىزىلىپ كەلدى. بىلتىر پاندەمياعا بايلانىستى بارلىق شارالار توقتاتىلعان بولاتىن. بيىل رەسمي شارا كارانتين تالاپتارىنا سايكەس، «سەگىز ارىس» قوعامدىق قورى ازاماتتارىمەن كەلىسە وتىرىپ شاعىن توپپەن وتكىزۋدى جوسپارلاپ وتىرمىز. داستارحان جايۋ، ءدام تاتۋ، جارمەڭكە ۇيىمداستىرۋ شارالارى بولمايدى.
ال امال مەرەكەسىن ۇلىقتاۋ وبلىس بويىنشا ونلاين فورمادا وتكىزىلەدى. وعان قالا، اۋدان بويىنشا 40 مادەنيەت ءۇيى، 62 كىتاپحانا مەن 6 مۋزەي مەكەمەسى تىڭعىلىقتى ات سالىسادى. سونىمەن قاتار 14-ناۋرىز كۇنى ءابىش كەكىلبايەۆ اتىنداعى الاڭدا كونسەرت بەرىلەدى. ءوڭىر تۇرعىندارى ءۇشىن وبلىستىق تەلەارنادان جاس ۇرپاققا ونەگە بەرەتىن ۇلتتىق ناقىشتاعى تانىمدىق باعدارلامالار تىكەلەي ەفيردەن شىعادى. ەڭ ءبىرىنشى بايلىق - دەنساۋلىق. سوندىقتان ساقتىق شارالارىن ۇستانۋعا مىندەتتىمىز»، - دەدى ءپانيا سارمۋرزينا.
باسپا ءسوز كونفەرەنسياسىنا ماڭعىستاۋ وبلىسى سانيتاريالىق- ەپيدەميولوگيالىق باقىلاۋ دەپارتامەنتىنىڭ ءبولىم باسشىسى بەردىبەك سارالتايەۆ قاتىستى. ونىڭ ايتۋىنشا، مەملەكەتتىك باس سانيتار دارىگەرى مەن وبلىستىڭ باس سانيتار دارىگەرىنىڭ قاۋلىسىنا سايكەس، ماڭعىستاۋدا بيىل امال مەيرامى مەن ناۋرىز مەرەكەسى تويلانبايدى. ويتكەنى وڭىردەگى كارانتيندىك شەكتەۋلەرگە بايلانىستى ادامداردىڭ كوپتەپ شوعىرلانۋىنا رۇقسات جوق. سونداي-اق حالىقتىڭ تىعىز بايلانىستا بولۋى ءقاۋىپتى ىندەتتىڭ ورشۋىنە اكەلەدى.
«كورىسۋ كۇنى قول الىسىپ، ءتوس قاعىستىرادى. ءبىراق ەپيدەميولوگيالىق تۇرعىسىنان ايتاتىن بولسام، وسىنداي ءقاۋىپتى كەزەڭدە قول الىسۋ دۇرىس ەمەس. سوندىقتان بارشا ماڭعىستاۋلىقتاردى امال مەرەكەسىندە ۇيدە، ءوز وتباسىمەن وتىرىپ، قوعامدىق ورىندارعا بارماۋعا شاقىرامىن. ويتكەنى قول بەرىپ، قۇشاقتاسۋ - ينفەكسيانىڭ تاراۋىنا سەبەپ»، - دەدى بەردىبەك سارالتايەۆ.
اۆتور: قاراكوز مارات
