موڭعوليادا قازاق ءتىلىن ۇيرەنىپ العان كانادالىق وتباسى قازاقستانعا قونىس اۋدارماق

ۇلانباتىر. قازاقپارات - قازاقستان رەسپۋبليكاسىنىڭ موڭعولياداعى توتەنشە جانە وكىلەتتى ەلشىسى جالعاس ادىلبايەۆ كانادالىق وتباسى كرەيگ پورتەلل مەن سارا پورتەللدى جانە ولاردىڭ ەكى قىزىن قابىلدادى.

بۇل تۋرالى قازاقپارات ەلشىلىكتىڭ جەلىدەگى پاراقشاسىنا سىلتەمە جاساپ حابارلايدى.

كرەيگ پورتەلل 1998 -جىلى موڭعوليانىڭ بايان- ولگەي ايماعىنا العاشقى رەت كەلىپ، جەرگىلىكتى قانداستارىمىزعا اعىلشىن تىلىنەن ساباق بەرگەن. كەيىن پورتەلل وتباسى وسى ايماققا كوشىپ كەلىپ، 8 جىل ىشىندە «Nova Lingua» ءبىلىم ورتالىعىن اشىپ، جەرگىلىكتى قازاقتارعا اعىلشىن ءتىلىن، ال بايان- ولگەي تابيعاتىن قىزىقتاۋ ءۇشىن كەلگەن شەتەل تۋريستەرىنە قازاق ءتىلىن ۇيرەتۋمەن اينالىسقان. قازىرگى ۋاقىتتا ۇلان- باتىر قالاسىندا مۇعالىمدىك ماماندىقتارى بويىنشا جۇمىس ىستەيدى.

كەزدەسۋ بارىسىندا پورتەلل وتباسى قازاق ءتىلىن مەڭگەرۋ قيىن بولماعانىن جانە بالالارى دا ازداپ قازاقشا تۇسىنەتىندەرىن ايتتى. بولاشاقتا كرەيگ پەن سارا قازاقستانعا قونىس اۋدارۋدى جانە ەلىمىزدىڭ سالت- داستۇرىمەن جانە ادەت- عۇرپىمەن تانىسۋدى جوسپارلاۋدا.

ءوز كەزەگىندە ەلشى ج. ادىلبايەۆ كەلە جاتقان ناۋرىز مەيرامى قارساڭىنداعى ەلشىلىك تاراپىنان ۇيىمداستىراتىن ءىس- شارالارعا بەلسەنە قاتىسۋعا شاقىرا وتىرىپ، انا ءتىلىمىزدى مەڭگەرگەن وزگە ۇلت وكىلدەرىنە قولداۋ كورسەتۋگە دايىن ەكەنىمىزدى جەتكىزدى. كەزدەسۋ سوڭىندا، قازاقستاندىق ديپلومات قوناقتارعا قازاقستاننان ەستەلىك رەتىندە ۇلتتىق ناقىشتاعى سىيلىقتاردى تارتۋ ەتتى.