ەرلان تۇرعىمبايەۆ تۇرمىستىق زورلىق- زومبىلىق باعىتىنداعى پروبلەمالاردى ايتتى
بۇل تۋرالى سەناتتاعى ۇكىمەت ساعاتىندا ىشكى ىستەر ءمينيسترى ەرلان تۇرعىمبايەۆ ءمالىم ەتتى، دەپ حابارلايدى قازاقپارات ءتىلشىسى.
«پاندەميا كەزەڭىندە ورشىگەن قىلمىستىق جالعىز ءتۇرى - ول تۇرمىستىق زورلىق- زومبىلىق. شىن مانىندە ادامدار تۇيىق كەڭىستىكتە شەكتەلىپ، بارلىق قىلمىستار وتباسىنىڭ ىشىندە ورىن الدى. ياعني وسى قوعامدىق قاتىناس سەكتورى پوليتسيا تاراپىنان ءتيىستى قاداعالاۋدان اجىراپ قالدى. ءبىز بارلىق كۇشىمىزدى كوشەلەرگە، بلوكپوستتارعا، كارانتيندىك ءىس- شارالارعا جۇمىلدىردىق»، - دەدى ە. تۇرعىمبايەۆ سەناتورلاردىڭ سۇراعىنا جاۋاپ بەرە وتىرىپ. ونىڭ ايتۋىنشا، سوڭعى كەزدەرى وتباسىلارداعى ونەگەلىك بايلانىستاردا كەمشىلىك بايقالىپ وتىر.
«وقشاۋلانۋ جاعدايىندا ادامداردىڭ ۇزاق ۋاقىت بويى وتىرۋى، سونداي- اق سپيرتتىك ىشىمدىكتەرگە سالىنۋى زورلىق- زومبىلىقتىڭ 80 پايىزى جەكە باسپانادا جاسالۋىنا الىپ كەلدى. قىلمىستاردىڭ باسىم بولىگى جاقىن قارىم- قاتىناستا بولعان ادامداردىڭ تاراپىنان بولدى»، - دەدى مينيستر.
وسى ورايدا ول بالالارعا قاتىستى قىلمىستاردى كوبىنە جاقىن بايلانىستا بولعان ادامدار جاساعان. بالالار ولارعا سەنىممەن قاراعان. ۆەدومستۆو باسشىسىنىڭ سوزىنە قاراعاندا، كەي كەزدەردە بالانىڭ اناسى وزىمەن بىرگە تۇراتىن ەر ادامدى قورعاۋ ماقساتىندا پوليتسياعا قاراما- قايشى تۇسىنىكتەمە بەرىپ جاتادى.
«قوعام ىشكى ىستەر ورگاندارى ءتيىستى شارالار قابىلداماي جاتىر دەپ ءجيى سىنعا الىپ جاتادى. سونىمەن بىرگە، بۇل ماسەلەدە بارشا قوعامنىڭ، قوعامدىق ۇيىمداردىڭ، دەنساۋلىق ساقتاۋ، ءبىلىم جانە عىلىم مينيسترلىكتەرىنىڭ بىرىككەنى ماڭىزدى. بىزگە پسيحولوگتار كەرەك»، - دەدى ە. تۇرعىمبايەۆ. بۇدان بۇرىن حابارلانعانداي، مينيستر ەلىمىزدە ۋچاسكەلىك ينسپەكتورلاردىڭ وكىلەتتىگى قالاي كەڭەيتىلەتىنىن ءتۇسىندىردى.
