بالالاردىڭ كانيكۋلى كەزىندە ونلاين وتەتىن ءىس-شارالار جوسپارى ازىرلەندى
بۇل تۋرالى ەلوردا اكىمدىگىنىڭ باسپا ءسوز ورتالىعىندا وتكەن ونلاين بريفينگتە ايتىلدى، دەپ حابارلايدى قازاقپارات ءتىلشىسى.
«ءبىز ءۇشىن ماڭىزدى ماسەلەنىڭ ءبىرى - وقۋشىلاردىڭ 20-ناۋرىزدان باستاپ 31-ناۋرىزعا دەيىن سوزىلاتىن كوكتەمگى كانيكۋلىن وتكىزۋ. كانيكۋل «قازاقستان بالالارى - كوكتەمگى تامشى» ۇرانىمەن وتەدى. كانيكۋل كەزىندە وقۋشىلاردىڭ پايدالى جانە بەلسەندى قىزمەتىن ۇيىمداستىرۋ ءۇشىن ونلاين رەجيمدە وتەتىن ءىس- شارالار جوسپارى ازىرلەندى»، - دەيدى نۇر-سۇلتان قالاسى ءبىلىم باسقارماسى باسشىسىنىڭ ورىنباسارى ريمما يمانگازينوۆا.
ول اتا-انالار مەن وقۋشىلاردان كارانتين شارالارىن ساقتاۋدى ءوتىندى.
«الدىمىزدا مەيرام كۇندەرى مەن كانيكۋل كۇتىپ تۇر. وقۋشىلاردىڭ جاقسى دەمالىپ، ءتورتىنشى توقسانعا ىنتا- جىگەرمەن كەلۋىنە تىلەكتەسپىز. ەپيدەميولوگيالىق جاعدايعا بايلانىستى سانيتارلىق نورمانى ساقتاۋلارىڭىزدى سۇرايمىز»، - دەيدى ول.
اۆتور: زارينا قاھارمان
