بالاعا ءتۇرلى ءتۇستىڭ اسەرى

نۇر-سۇلتان. قازاقپارات - بوبەكتىڭ قاي تۇسكە ۇمتىلاتىنىنا قاراپ، ونىڭ قانداي سىرقاتى بار ەكەنىنە دە انىقتاما جاساۋعا بولادى دەيدى عالىمدار.

ءتۇس ارقىلى ەمدەۋدى بالا تاربيەسىنە كۇندەلىكتى قولدانۋ كەرەك. ونى ويىن تۇرىنە اينالدىرۋعا دا بولادى. بالاڭىزدىڭ بولمەسىن بەزەندىرگەندە، وعان ويىنشىق، كيىم ساتىپ الاردا وسىنى ەسكەرىڭىز.

قىزىل ءتۇس

بۇل - ءومىر كۇشىنىڭ ءتۇسى. ول - جۇيكە جۇيەسى مەن ىشكى سەزىمتال بەزدەردىڭ بەلسەندىلىگىن ارتتىراتىندىقتان، ادامنىڭ قۇشتارلىعى مەن ۇمتىلىسىنىڭ بەلگىسى. بۇل ءتۇس - جۇرەك سوعىسى مەن تىنىستى جيىلەتىپ، بۇلشىق ەتتەر جيىرىلۋىن كۇشەيتەدى. قان قىسىمىن جوعارىلاتىپ، زات الماسۋىن ۇدەتىپ، ميدىڭ بەلسەندى جۇمىس ىستەۋىنە اسەر ەتەدى. ناتيجەسىندە ادام اعزاسىنداعى تىندەردىڭ قورەكتەنۋى ايتارلىقتاي جاقسارادى. بۇل ءتۇستىڭ ەڭ نەگىزگى پسيحولوگيالىق ارتىقشىلىعى - ادامعا سەنىمدىلىك پەن بەلسەندىلىك سىيلاي الاتىنىندا.

كەڭەس: ەگەر بالاڭىزدىڭ سەزىمتالدىعى باياۋ، مىنەزى سامارقاۋ بولسا، وندا وعان قىزىل ءتۇستى كيىمدەر كيگىزگەنىڭىز ءجون. ال بالدىرعان وتە بەلسەندى بولسا بۇل تۇسكە كوپ جولاتپاعان ابزال. ويتكەنى ول ءسابيدىڭ جۇيكە جۇيەسىن شامادان تىس قوزدىرىپ، تەز شارشاتادى.

بالانى ۇيىقتاتاردا ويىنشىقتارى مەن باسقا دا قورشاعان زاتتار قىزىل بولماعانى ءجون. ەمىزۋلى سابيلەر وسى سەبەپتەن دە كوپ جىلاۋى مۇمكىن. بالاعا قىزىل ءتۇستى بولمەدە، قىپ- قىزىل ىدىستارمەن تاماق بەرۋگە بولمايدى. قىزىل ءتۇستىڭ اسەرىمەن بالا تاماقتى تەز ءارى كوپ ءىشىپ قويادى. ەگەر بالاڭىزدىڭ تابەتى بولماسا، قىزىل ءتۇستى ىدىسپەن تاماقتاندىرىپ، تاجىريبە جاساپ بايقاپ كورىڭىز. ءۇي ءىشىن، اسىرەسە بالالار بولمەسىن بەزەندىرگەندە قىزىل ءتۇستى ابايلاپ قولدانۋدى ۇمىتپاڭىز.

قىزىل سارى

بۇل ءتۇس - سەرگەكتىكتىڭ، قۋانىش پەن جەتىستىكتىڭ جانە قىزىق دۋماننىڭ ءتۇسى. بالانى كۇن شۋاقتى- قىزىل سارى، سارى، التىن تۇستەرمەن كيىندىرگەن وتە جاقسى. بۇل تۇستەردىڭ قىزمەتى - كۇشەيتۋ، جەتىلدىرۋ، شىنىقتىرۋ. قىزىل سارى ءتۇستىڭ تولقىن ءدىرىلى اس قورىتۋدى جوندەيدى. سوندىقتان ونى تاماقتاندىرار كەزدە قولدانعان ابزال. بوبەككە اناسىنىڭ قىزىلسارى نەمەسە التىن ءتۇستى كيىمدەر كيگەنى قاتتى ۇنايدى. بۇل وسى ءتۇستىڭ مەيىرىمدىلىك پەن جىلىلىق قۋاتىنا باي ەكەنىن اڭعارتادى. بۇكىل تىرشىلىك اتاۋلى كۇن نۇرىنا تالپىنادى. بالكىم كۇن رەڭدى تۇستەردىڭ تارتىمدىلىعى سودان بولار. سۋرەتشىلەر كوبىنە قيالداعى كەمەل الەمدى قىزىل سارى تۇستەرمەن بەينەلەيدى. ءتىپتى بالدىرعانداردىڭ ءوزى دە اكەسىن، اناسىن جانە وزدەرىن قىزىل سارى تۇسپەن سالعاندى ۇناتادى ەكەن.

كەڭەس: ەگەر بالاڭىزدىڭ بولمەسى تەرىسكەي بەتتە ورنالاسسا، كۇن ساۋلەسىنىڭ جەتكىلىكسىزدىگىن قابىرعاعا قىزىلسارى ءتۇسقاعاز جاپسىرۋ ارقىلى تولىقتىرۋعا بولادى. ال ەگەر بالالار بولمەسى كۇنگەي بەتتە بولسا، وندا بۇل ءتۇستى پايدالانباي- اق قويىڭىز. سەبەبى بۇل ءتۇستىڭ بەلسەندىلىگى جوعارى ەكەنىن ايتتىق. بۇل ءسابيدىڭ ۇيقىسىن قاشىرىپ، تىنىشىن الۋى مۇمكىن. ال وعان قىزىلسارى ويىنشىقتار مەن كيىمدەر الىپ بەرىڭىز.

سارى

اشىق سارى ءتۇس كوڭىل- كۇيدى كوتەرەدى. ءبىراق ەڭ كوڭىلدىسى - التىننىڭ ءتۇسى. ءوزىڭىزدى جەڭىل سەزىنۋگە كومەكتەسەدى. بۇل تۇستەردى بالاڭىز جابىرقاۋ، تۇيىق بولعان كەزدەردە پايدالانىڭىز. اقىل ەسىنىڭ دامۋى كەشەۋىلدەگەن بالالارعا دا كومەكتەسە الادى. بۇل تۇسكە ءتان قاسيەتتەردىڭ ءبىرى - ميدىڭ قىزمەتىن جاقسارتۋ جانە كورۋ قابىلەتىن ارتتىرۋ.

كەڭەس: بالالار بولمەسىن اشىق سارى تۇسپەن بەزەندىرۋدىڭ قاجەتى جوق. سەبەبى، سارى ءتۇس ۇيقى قاشىرادى. دۇرىسى تىنىش، توسەككە لايىق ءتۇس تاڭداۋ كەرەك. از- ازداپ التىن ءتۇستى ارالاستىرساڭىز، بوبەگىڭىزدىڭ تاڭعى ۇيقىدان ويانۋى كوڭىلدىرەك بولار ەدى.

جاسىل

جاسىل - وسىمدىك الەمىنىڭ ءتۇسى. جەر بەتىنە كەڭ تاراعان. جاسىل - دەنساۋلىق پەن تۇراقتىلىقتىڭ دا ءتۇسى. ول تىنىشتاندىرۋ، اۋرۋدى باسۋ، قان قىسىمىن قالىپقا ءتۇسىرۋ، جۇيكە- جۇيەسىن جاتتىقتىرۋ، شارشاعاندى باسۋ، ەرەكشە ساۋىقتىرۋ قاسيەتىنە يە.

ەمىزۋلى بوبەكتەر جاسىل ءتۇستى زاتتاردىڭ بارىنە تالپىنادى. بۇل ءتۇستىڭ جۇمساق، ءنارلى جانە قاۋىپسىز ەكەنىن سەزگەندىكتەن بولار. سوندىقتان بالاعا قاۋىپتى زاتتار جاسىل ءتۇستى بولماۋى كەرەك. جاسىل ءتۇس ۇيقىسىزدىقتى قالپىنا كەلتىرۋ ءۇشىن دە قولدانىلادى. سول ءۇشىن ءسابي توسەگىنىڭ باسىنا جاسىل سۇلگى نەمەسە ويىنشىقتار ءىلىپ قويىڭىز.

كەڭەس: جاسىل سۋرەتتەرى بار كىتاپشالاردى بالاڭىزعا وقىپ، اڭگىمەلەپ بەرسەڭىز بالا تەز قابىلدايدى ءارى كوپ اقپاراتتى قابىلداۋعا زەيىندى بولادى. بۇل ءتۇس ەستە ساقتاۋ قابىلەتى مەن شىعارماشىلىقتى دامىتادى. ەگەر ءسابي اۋىرىپ قالسا، جاسىل ءتۇستى كيىم كيگىزىپ، رۋحىن سەرپىلتىڭىز. ويتكەنى بۇل ءتۇس اعزانى ساۋىقتىرادى. جاسىل ءتۇستىڭ زيان قاسيەتى جوق.

كوگىلدىر

بۇل - تىنىشتىقتىڭ ءتۇسى. ول بۇلشىق ەتتىڭ شيرىعۋى مەن قىسىمىن تومەندەتىپ، تىنىس الۋدى قالىپقا كەلتىرەدى. پسيحولوگتار بالالاردىڭ توسەك جابدىقتارىن وسى تۇستەن الىپ، ولاردىڭ جاتىن بولمەسىنە وسىنداي ءتۇسقاعازدار جاپسىرۋعا كەڭەس بەرەدى. كوگىلدىر ءتۇستىڭ بولمە كەڭىستىگىن كەڭەيتىپ كورسەتەتىن قاسيەتى دە بار. سوندىقتان كىشكەنە، تار بولمەلەرگە بۇل ءتۇس وتە ىڭعايلى.

كەڭەس: كوگىلدىر ءتۇستى قابىرعالار بالدىرعانداردى تىنىشتاندىرادى. ۇركەك ءارى پسيحولوگيالىق جاقتان تەز قوزاتىن سابيلەر ءۇشىن كوگىلدىر ءتۇس جاسىل تۇستەن دە پايدالى. ءبىراق، بۇل ءتۇستى اس بولمەسىنە قولدانۋعا بولمايدى ەكەن. سەبەبى كوگىلدىر تۇستەن ادامنىڭ ءدام سەزۋ، قابىلداۋ سەزىمدەرى كومەسكىلەنىپ، ۇيقىعا جەتەلەيدى.

كوك

بۇل كىشكەنە سابيلەر ءۇشىن تىم سۋىق ءارى مازاسىزداندىراتىن ءتۇس بولىپ ەسەپتەلەدى ەكەن. كوك تۇستەن بالالار قورقادى نەمەسە جايسىزدانادى دەيدى. وزىڭىزگە دە، بالاڭىزعا دا بۇل تۇستەن كيىم ساتىپ الماي- اق قويعانىڭىز ءجون.

قوڭىر

قوڭىر - مامىراجاي وتباسىنداعى بەرەكەنىڭ جانە قاۋىپسىزدىكتىڭ ءتۇسى. ول شىققان تەگىڭ مەن تامىرىڭدى سەزىنۋدى ارتتىرادى. ءۇي، وتباسى، تۋىستاردى جاقىنداستىرۋعا، ءىش تارتۋعا سەبەپكەر بولا الادى. بالكىم كوپتەگەن بالدىرعانداردىڭ سۇيىكتى ويىنشىعىنىڭ قوڭىر ايۋ بولاتىنى سودان شىعار. اتا- اناسىنىڭ ماحابباتى مەن ىستىق ىقىلاسىنا بولەنىپ وسكەن بالالار بۇل ءتۇستى كەرەكسىنە بەرمەيدى. قوڭىر ءتۇس كوبىنە فيزيولوگيالىق جانە پسيحولوگيالىق السىزدىككە ۇشىراعان بالالاردى ەمدەگەندە قولدانىلادى ەكەن.

كۇلگىن

بۇل ءتۇس جۇرەك پەن وكپە جۇمىسىن جاقسارتىپ، اعزا مۇشەلەرىنىڭ توزىمدىلىگىن ارتتىرادى. كۇلگىن ءتۇستى كيىمدەر بالانىڭ تىنىس الۋىنا كەدەرگى كەلتىرەتىندەي، اۋىر كورىنۋى مۇمكىن. ەمىزۋلى سابيلەر كەيدە كۇلگىن ءتۇستى باس كيىمدەر مەن شۇلىقتارىن لاقتىرىپ تاستاۋعا تىرىسادى ەكەن.

قارا مەن سۇر

بۇلار بالاعا لايىق ءتۇس ەمەس. بالدىرعاندار الەمدى اشىق- جارقىن بوياۋلار ارقىلى قابىلداعانى ءجون.

كەڭەس: بالاڭىزدىڭ قانداي ءتۇستى ۇناتاتىندىعىنا نازار اۋدارىڭىز. وزىنە نە كەرەك جانە نە ۇنايتىنىن ول ءوزى تاڭداۋى ءتيىس.

massaget.kz