اقىلبەك كۇرىشبايەۆ ج و و وقىتۋشىلارىنىڭ جالاقىسىن كوتەرۋگە قاتىستى ۇسىنىس ايتتى
«الەمدىك جەتەكشى ۋنيۆەرسيتەتتەردىڭ ساتتىلىك فورمۋلاسى - پروفەسسور- وقىتۋشىلارىنىڭ زاماناۋي بىلىكتىلىگىندە. سول سەبەپتى ولاردىڭ الەۋەتىن دامىتۋ وقۋ ورنىنىڭ باستى نازارىندا بولىپ، قاجەتتى ىنتالاندىرۋلار جاسالادى جانە ءبىلىم بەرۋ ءارى عىلىمي قىزمەتتىڭ بارلىق ساياساتىن تىكەلەي وقىتۋشى- عالىمنىڭ ءوزى انىقتاپ، مەنەدجەرلەردى سايلاۋعا، بيۋدجەتتى بولۋگە قاتىسادى. ناقتىراق ايتساق، ولاردا ۋنيۆەرسيتەتتى باسقارۋ جۇيەسى القالىق جانە دەموكراتيالىق قاعيداتتارعا ساي قالىپتاسقان. ولاردىڭ عىلىمي كەڭەسى رەكتوردىڭ كانديداتۋراسىن ۇسىنىپ قانا قويماي، ج و و- عا قانداي باسشى قاجەت ەكەنىن وزدەرى شەشەدى، ياعني وعان قويىلاتىن بىلىكتىلىك تالاپتارىن انىقتايدى. اتالعان جەتەكشى ۋنيۆەرسيتەتتەردەگى باسقارۋ جۇيەسىنىڭ تۇبەگەيلى ايىرماشىلىقتارىن كورسەتەتىن كوپتەگەن مىسالداردى كەلتىرۋگە بولادى»، - دەپ توقتالدى سەناتور.
ونىڭ ايتۋىنشا، قازاقستانداعى مەملەكەتتىك جوعارى وقۋ ورنىنىڭ قاتارداعى وقىتۋشىسىنىڭ ورتاشا جالاقىسى شامامەن 120 مىڭ تەڭگەنى قۇرايدى، بۇل مەكتەپتەگى كەيبىر مۇعالىمدەردىڭ جالاقىسىنا قاراعاندا از. سونىمەن قاتار، كوپتەگەن پەداگوكتاردىڭ جىلدىق وقۋ جۇكتەمەسى 700 ساعات شەگىندە (ساباققا دايىندالۋ ۋاقىتىن ەسەپتەمەگەندە). سونىمەن قاتار، ول عىلىممەن جانە كۋراتور رەتىندە تاربيە جۇمىسىمەن اينالىسۋعا ۋاقىت تابۋى ءتيىس.
«ەگەر تۋراسىن ايتاتىن بولساق، ءبىزدىڭ ج و و- داعى وقىتۋشىلىق جۇمىس بۇگىنگى كۇنى كونۆەيەرلىك وندىرىسكە اينالىپ كەلەدى، ال وقىتۋشىنىڭ ءوزى ءار ءتۇرلى ەسەپتەر، رەيتينگتەر مەن عىلىمي ماقالالاردى جاريالاۋ بويىنشا مىندەتتەمەلەر مەن باسقا دا بۇيرىق، نۇسقاۋلاردى ءۇنسىز ورىنداۋشىعا اينالۋدا. ۋنيۆەرسيتەتتەردىڭ عىلىمي كەڭەسى ناقتى باسقارۋ تەتىكتەرىنە يە ەمەس جانە كوپتەگەن ۋنيۆەرسيتەتتەردە رەكتوراتتىڭ شەشىمدەرىن قامتاماسىز ەتۋ جونىندەگى دەكلاراتيۆتى ورگانعا اينالدى. ال ۋنيۆەرسيتەتتە جۇمىس ىستەيتىن پروفەسسورلىق- وقىتۋشىلىق قۇرامنىڭ وكىلدەرى ديرەكتورلار كەڭەسىنە تاۋەلسىز ديرەكتور رەتىندە كىرۋگە قۇقىعى جوق، ويتكەنى بۇل اكتسيونەرلىك قوعام تۋرالى زاڭعا قايشى كەلەدى»، - دەدى ا. كۇرىشبايەۆ.
«ۋنيۆەرسيتەتتەرگە اكادەميالىق ەركىندىك بەرە وتىرىپ، ءبىز ولاردىڭ باسشىلىعىنا سىرتتان ج و و ىسىنە ارالاسۋدى شەكتەيتىن كەڭ وكىلەتتىكتەر بەردىك. ءبىراق پروفەسسور- وقىتۋشىلار ۇجىمىنىڭ جانە عىلىمي كەڭەستەردىڭ باسقارۋ جۇيەسىنە قاتىسۋىن، سونداي- اق دامىعان ەلدەردەگىدەي ديرەكتورلار كەڭەسى قۇرامىنداعى وكىلدىگىن قامتاماسىز ەتپەدىك. قازىرگى ۋاقىتتا پرەزيدەنتىمىزدىڭ جاڭاشىل باستامالارىنىڭ ارقاسىندا ەلىمىزدە قوعامىمىزدى دەموكراتيالاندىرۋ، قوعامدىق باقىلاۋدى دامىتۋ، جەرگىلىكتى ءوزىن- ءوزى باسقارۋ، اكىمدەردىڭ سايلانۋى جانە باسقا دا قادامدار بويىنشا پروگرەسسيۆتى وزگەرىستەر بولىپ جاتىر. ەلىمىزدىڭ بولاشاعىن قالىپتاستىراتىن جوعارى وقۋ ورىندارى ءبىرىنشى كەزەكتە دەموكراتيالىق قاعيداتتاردى ساقتاۋىمەن باسقاعا ۇلگى بولۋى ءتيىس»، - دەدى دەپۋتات.
ونىڭ پايىمىنشا، جوعارىدا ايتىلعاندارعا بايلانىستى بارلىق جوعارى وقۋ ورىندارى ءۇشىن مەملەكەتتىك ءبىلىم بەرۋ گرانتتارىنىڭ قۇنىن ۇلتتىق ۋنيۆەرسيتەتتەر دەڭگەيىنە دەيىن كوتەرۋدى جانە قاتارداعى ۋنيۆەرسيتەتتەر وقىتۋشىلارىنىڭ جالاقىسىن ولاردىڭ دەڭگەيىمەن تەڭەستىرۋ تۋرالى ماسەلەنى ادىلەتتى قاراپ، شەشۋ كەرەك.
اۆتور: رۋسلان عابباسوۆ
