الماتىدا ناۋرىز مەيرامىنا ارنالعان كورپوراتيۆتىك شارالارعا تىيىم سالىندى

الماتى. قازاقپارات - الماتىدا ناۋرىز جانە باسقا دا مەرەكەلىك كورپوراتيۆتەردى ۇيىمداستىرۋعا جانە وتكىزۋگە تىيىم سالىندى.

بۇل تۋرالى قالانىڭ باس سانيتارلىق دارىگەرى جانداربەك بەكشيننىڭ كوروناۆيرۋستىڭ الدىن الۋ شارالارىن كۇشەيتۋ تۋرالى جاڭا قاۋلىسىندا ايتىلعان، دەپ حابارلايدى قازاقپارات.

جاڭا قاۋلىعا سايكەس، الماتىدا توپتىق ءىس-شارالاردى، كورمەلەردى، فورۋمداردى، كونفەرەنسيالاردى، سونداي-اق وتباسىلىق ءىس-شارالاردى (بانكەتتەر، ۇيلەنۋ تويلار، مەرەيتويلار، ەسكە الۋ) نىساندار مەن ۇيلەردە وتكىزۋگە تىيىم ساقتالادى.

بۇدان بولەك، ناۋرىز جانە باسقا دا مەرەكەلىك كورپوراتيۆتەردى ۇيىمداستىرۋعا جانە وتكىزۋگە رۇقسات جوق. قىزمەتى رۇقسات ەتىلمەگەن وبەكتىلەرگە بارۋعا تىيىم سالىنادى. بۇل - بوۋلينگ ورتالىقتارى، كومپيۋتەر كلۋبتارى («Ashyq» پيلوتتىق جوباسىنا قاتىساتىن وبەكتىلەردى قوسپاعاندا)، بيليارد، كاراوكە، باتۋتتار، تۇنگى كلۋبتار، بۋكمەكەرلىك كەڭسەلەر، لوتو جانە ويىن كلۋبتارى، جابىق ءۇي-جايلارداعى ويىن الاڭدارى مەن اتتراكتسيوندار، ونىڭ ىشىندە سپورت وبەكتىلەرىندە ورنالاسقانداردى قوسپاعاندا، مۇز جانە روليكتى مۇز ايدىندارى. ساۋدا، ويىن-ساۋىق ورتالىقتارى مەن بازارلار سەنبى جانە جەكسەنبىدەن باسقا كۇندەرى ادەتتەگى رەجيمدە جۇمىس ىستەيدى. ەكى كۇن دەمالىستا جابىق بازارلاردىڭ قىزمەتى توقتاتىلادى.

اشىق بازارلار (ازىق-تۇلىك جانە ازىق-تۇلىكتىك ەمەس) تەك جەكسەنبى جابىق بولادى.

سۋپەرماركەتتەر مەن گيپەرماركەتتەر ساعات 06.00-02.00 ارالىعىندا جۇمىس ىستەيدى. سونىمەن قاتار، قالادا ءدامحانالار جۇمىسىنا شەكتەۋ جاسالدى. قوعامدىق كولىكتەرگە، تاكسيلەرگە، مەترودا، اۋەجايلاردا، تەمىرجول جانە اۆتوۆوكزالداردا، اۋلاداعى بالالار الاڭدارىنا، ازىق-تۇلىك جانە ازىق-تۇلىك ەمەس بازارلاردا جانە باسقا دا قوعامدىق ورىنداردا سانيتارلىق-دەزينفەكتسيالىق وڭدەۋ جۇرگىزۋ جۇكتەلىپ وتىر. سونداي-اق وففلاين رەجيمىندە جينالىستار (كەڭەستەر) وتكىزۋگە تىيىم بار.

اتاپ وتىلگەندەي، كوروناۆيرۋس ينفەكتسياسىنىڭ جەڭىل نەمەسە ورتاشا جانە سيمپتومسىز تۇرىمەن اۋىراتىن ناۋقاستاردىڭ ءۇي كارانتينىن ساقتاۋ مۇمكىندىكتەرى بولماسا اۋرۋحاناعا جاتقىزىلادى. قاۋلى 2021-جىلعى 13- ناۋرىزدا كۇشىنە ەنەدى.