توماس باح حالىقارالىق وليمپيادا كوميتەتى پرەزيدەنتى قىزمەتىنە قايتا سايلاندى

نۇر-سۇلتان. قازاقپارات - توماس باح حالىقارالىق وليمپيادا كوميتەتىنە (ح و ك) پرەزيدەنتى قىزمەتىنە قايتا سايلاندى، دەپ حابارلايدى قازاقپارات ءتىلشىسى اتالعان ۇيىمنىڭ سايتىنا سىلتەمە جاساپ.

بۇل شەشىم ح و ك- ءنىڭ 137-سەسسياسىندا وتكىزىلگەن سايلاۋدا قابىلداندى. ونلاين رەجيمدە ۇيىمداستىرىلعان شارا بارىسىندا ول 93 داۋىس جيناپ، ءبىر ادام قارسىلىعىن ءبىلدىردى.

ايتا كەتەيىك، اتالعان سايلاۋدا ءبىر عانا ۇمىتكەردىڭ كانديداتۋراسى تاڭدالدى. توماس باح جاڭادان سايلانعان قىزمەتىنە 3- شىلدە-8- تامىز ارالىعىندا وتەتىن توكيو وليمپياداسىنان كەيىن كىرىسەدى.

ەستەرىڭىزگە سالا كەتەلىك، ول - حالىقارالىق وليمپيادا كوميتەتىنىڭ توعىزىنشى پرەزيدەنتى.

بۇل قىزمەتتى 2013-جىلدان بەرى اتقارىپ كەلەدى. اتالعان ۇيىمعا 1991-جىلى مۇشە ەسەبىندە قابىلدانعان ول 1996-2000-جىلدار ارالىعىندا اتقارۋ كوميتەتىنىڭ قۇرامىنا ەندى.

ال 2000-2013-جىلداردا ۆيتسە-پرەزيدەنت بولدى. بيىل 68 جاسقا تولاتىن توماس باح 1976-جىلى سەمسەرلەسۋ سپورتىنان وليمپيادا چەمپيونى اتاعىن جەڭىپ العان ەدى.