ەلوردا مەكتەپتەرىنە ءنازىر تورەقۇلوۆ، سماعۇل ءسادۋاقاسوۆ، مۇستافا شوقاي ەسىمدەرى بەرىلەدى

نۇر- سۇلتان. قازاقپارات - نۇر- سۇلتان قالاسىنىڭ بىرنەشە مەكتەبى مەن مادەنيەت ۇيىمىنا قازاق قايراتكەرلەرىنىڭ اتى بەرىلدى.

بۇل تۋرالى قالالىق تىلدەردى دامىتۋ جانە مۇراعات ءىسى باسقارماسى باسشىسىنىڭ مىندەتىن اتقارۋشى ساكەن ەسىركەپوۆ ايتىپ بەردى، دەپ حابارلايدى قازاقپارات.

بۇل ۇسىنىستار 2021 -جىلعى 13- قاڭتارداعى نۇر- سۇلتان قالاسى ونوماستيكا كوميسسياسىنىڭ وتىرىسىندا ماقۇلدانعان.

«اتاپ ايتقاندا №35 مەكتەپ- ليتسەيگە كورنەكتى مەملەكەت جانە قوعام قايراتكەرى، العاشقى قازاق ەلشىلەرىنىڭ ءبىرى، ديپلومات ءنازىر تورەقۇلوۆتىڭ، №49 ورتا مەكتەپكە - الاش قايراتكەرى، عالىم، دراماتۋرگ، جازۋشى، جۋرناليست قوشكە كەمەڭگەر ۇلىنىڭ، №51 مەكتەپ- گيمنازياسىنا - قازاق حالقىنىڭ ءبىرتۋار كۇرەسكەر پەرزەنتى مۇستافا شوقايدىڭ، №53 مەكتەپ- ليتسەيگە - كەڭەس وداعىنىڭ باتىرى، جازۋشى، ەكىنشى دۇنيەجۇزىلىك سوعىستىڭ داڭقتى جاۋىنگەرى باۋىرجان مومىش ۇلىنىڭ، №64 ورتا مەكتەپكە - بيولوگ- عالىم، مينەرولوگيا عىلىمدارىنىڭ دوكتورى، پروفەسسور قانىش ساتبايەۆتىڭ، №67 گيمنازياعا - قازاق ادەبيەتىنىڭ كورنەكتى وكىلى، ايگىلى «كوشپەندىلەر» تريلوگياسى مەن «التىن وردا» ەڭبەگىنىڭ اۆتورى ءىلياس ەسەنبەرليننىڭ، ال №74 مەكتەپ- گيمنازياعا - اقيىق اقىن مۇقاعالاي ماقاتايەۆتىڭ ەسىمىن بەرۋ ماقۇلداندى»، - دەدى سپيكەر نۇر- سۇلتان قالاسى ءماسليحاتىنىڭ كەزەكتەن تىس وتىرىسىندا.

№78 مەكتەپ- گيمنازياعا - مەملەكەت قايراتكەرى، جازۋشى، «ەڭبەك تۋى»، «ەڭبەكشى قازاق»، ياعني بۇگىنگى «ەگەمەن قازاقستان» گازەتىنىڭ باس رەداكتورى بولىپ قىزمەت ەتكەن سماعۇل ءساداقاسوۆتىڭ، №90 گيمنازياعا - جازۋشى، اباي تانۋ عىلىمىنىڭ نەگىزىن قالاۋشىلاردىڭ ءبىرى قايىم مۇحامەدحانوۆتىڭ ەسىمى بەرىلەدى.

«سونىمەن بىرگە، نۇر- سۇلتان قالاسى اكىمدىگىنىڭ «Nomad city hall» تەاترىن نۇر- سۇلتان قالاسى اكىمدىگىنىڭ ءازىربايجان مامبەتوۆ اتىنداعى مەملەكەتتىك دراما جانە كومەديا تەاترى دەپ قايتا اتاۋ ۇسىنىسى قولداۋ تاپتى. بۇل ەسىمدەردىڭ بارلىعى ءتيىستى مەكەمە ۇجىمدارىنىڭ اتىنان جازىلعان جانە عالىمدار مەن زيالى قاۋىمنان تۇسكەن وتىنىشتەردى نەگىزگە الا وتىرىپ قاراستىرىلدى»، - دەدى س. ەسىركەپوۆ.