قازاقستاندا باعالى مەتالدىڭ زاڭسىز اينالىمى ءۇشىن جاۋاپكەرشىلىك كۇشەيتىلمەك

نۇر- سۇلتان. قازاقپارات - قازاقستاندا باعالى مەتالدىڭ زاڭسىز اينالىمى باعىتىندا جاۋاپكەرشىلىكتى كۇشەيتۋ كەرەك.

بۇل تۋرالى ءماجىلىستىڭ جالپى وتىرىسىندا «ەۋرازيالىق ەكونوميكالىق وداق شەڭبەرىندە باعالى مەتالدارمەن جانە اسىل تاستارمەن وپەراتسيالاردى جۇزەگە اسىرۋ ەرەكشەلىكتەرى تۋرالى كەلىسىمدى راتيفيكاتسيالاۋ تۋرالى» زاڭ جوباسىن تالقىلاۋ كەزىندە ايتىلدى، دەپ حابارلايدى قازاقپارات ءتىلشىسى.

«2016 -جىلدان بەرى مينيسترلىك تۇراقتى نەگىزدە باعالى مەتالدار اينالىمى، ونى زاڭسىز شىعارۋ مەن قاي وڭدەۋگە قاتىستى جاڭاپكەرشىلىكتى كۇشەيتۋگە باستاماشىلىق ەتتى. 2018 -جىلى اقمولا وبلىسىنداعى كاسىپورىنداردا اسىل مەتالداردى جىمقىرۋ جاعدايى بولدى. ءبىز سول كەزدە دە بۇل ماسەلەنى كوتەرگەن ەدىك»، - دەدى ق ر يندۋستريا جانە ينفراقۇرىلىمدىق دامۋ ءمينيسترى بەيبىت اتامقۇلوۆ.

ءوز كەزەگىندە ءماجىلىس ءتوراعاسى نۇرلان نىعماتۋلين وسى قىلمىس ءۇشىن جاۋاپكەرشىلىك كۇشەيتىلگەن ەلدەردىڭ تاجىريبەسىن ايتتى.

«ە ا ە و- نىڭ ەلدەرىندە باعالى مەتالداردىڭ زاڭسىز اينالىمى ءۇشىن قىلمىستىق جاۋاپكەرشىلىك قاراستىرىلعان. ماسەلەن، رەسەيدە باعالى مەتالدىڭ زاڭسىز اينالىمىنا 3 جىلعا دەيىن باس بوستاندىعىنان ايىرۋ قاراستىرىلعان. وسى ارەكەتتەر ءىرى كولەمدە نەمەسە ۇيىمداسقان قىلمىس تۇرىندە جاسالسا، 7 جىلعا دەيىن باس بوستاندىعىنان ايىرۋ جازاسى بەرىلەدى. وسىعان ۇقساس باپ بەلارۋس زاڭناماسىندا قاراستىرىلعان. ال بىزدە باعالى مەتالدىڭ زاڭسىز اينالىمى ءۇشىن اكىمشىلىك جاۋاپكەرشىلىك ەسكەرىلگەن. ەلىمىزدە باعالى مەتالدى ۇرلاۋ مەن ونىڭ زاڭسىز اينالىمى جىل سايىن ارتىپ كەلەدى»، - دەدى ن. نىعماتۋلين.

وسى ورايدا ول قىلمىسكەرلەردى اكىمشىلىك قاماۋعا الۋ نەمەسە 17 ا ە ك سوماسىنداعى ايىپپۇل توقتاتا الماي جاتقانىن اتاپ ءوتتى. سەبەبى التىندى زاڭسىز ءوندىرۋ، ساتىپ الۋ، زاڭسىز ساۋدالاۋ تابىستى بولىپ تۇر.

«ىشكى ىستەر مينيسترلىگى دە، باس پروكۋراتۋرا دا جاۋاپكەرشىلىكتى كۇشەيتۋگە قارسى ەمەس. بۇل رەتتە مينيسترلىك (ق ر ي ي د م) قاي تاراپتى قولداپ تۇر دەگەن ساۋال تۋىنداپ وتىر. نەگە قاجەتتى قادامدار جاسالماعان؟ وكىلەتتى ورگان رەتىندە يندۋستريا جانە ينفراقۇرىلىمدىق دامۋ مينيسترلىگى باعالى مەتالدىڭ زاڭسىز اينالىمى ءۇشىن جازانى كۇشەيتۋگە ءبىرىنشى كەزەكتە مۇددەلى بولۋى ءتيىس. سىزدەرگە بۇل پروبلەمانى ايتىپ قانا قويماي، ءتيىستى ۇسىنىس ەنگىزۋ كەرەك»، - دەدى ءماجىلىس ءتوراعاسى.

ايتا كەتەيىك، بۇگىن ءماجىلىستىڭ جالپى وتىرىسىندا «ەۋرازيالىق ەكونوميكالىق وداق شەڭبەرىندە باعالى مەتالدارمەن جانە اسىل تاستارمەن وپەراتسيالاردى جۇزەگە اسىرۋ ەرەكشەلىكتەرى تۋرالى كەلىسىمدى راتيفيكاتسيالاۋ تۋرالى» زاڭ جوباسى ماقۇلداندى.