20:43, 09 - ناۋرىز 2021 | GMT +5
توكيوداعى جازعى وليمپيادا ويىندارىنا شەتەلدەن كورەرمەن كىرگىزىلمەيدى
بەيجىڭ. قازاقپارات - جاپونيا بيلىگى توكيو قالاسىنداعى جازعى وليمپيادا ويىندارىن شەتەلدىك كورەرمەنسىز وتكىزۋ شەشىمىن قابىلدادى، دەپ حابارلايدى «قازاقپارات» ح ا ا ءتىلشىسى جاپونيانىڭ Kyodo News اقپارات اگەنتتىگىنە سىلتەمە جاساپ.
اگەنتتىك مالىمەتى بويىنشا، توكيودا 2021 -جىلدىڭ جازىندا وتەتىن وليمپيادا جانە پاراليمپيادا ويىندارىنا شەت مەملەكەتتەردەن كورەرمەن كىرگىزىلمەيدى. جاپونيا بيلىگى بۇل شەشىمدى كوروناۆيرۋستىڭ تارالۋ قاۋپىنە بايلانىستى قابىلداپ وتىر.
«ۇكىمەت جاپون قوعامىنىڭ الاڭداۋشىلىعى مەن كوپتەگەن ەلدەردە ىندەتتىڭ بۇدان دا جۇقپالى نۇسقالارىنىڭ انىقتالۋ فاكتىسىن ەسەپكە الا وتىرىپ، شەتەلدەن جانكۇيەرلەردى قابىلداۋ مۇمكىن ەمەس دەپ شەشتى»، - دەپ جازادى اگەنتتىك.
ەسكە سالا كەتسەك، توكيودا جازعى وليمپيادا ويىندارى 23-شىلدە مەن 8-تامىز ارالىعىندا، ال پاراليمپيادا ويىندارى 24-تامىز بەن 5-قىركۇيەك ارالىعىندا وتەدى.
