ۇلتتىق كەڭەس جاڭا رەفورمالار ۇسىناتىن ماڭىزدى قۇرىلىمعا اينالدى - توقايەۆ

نۇر-سۇلتان. قازاقپارات - ۇلتتىق قوعامدىق سەنىم كەڭەسى جاڭا رەفورمالار ۇسىناتىن ماڭىزدى قۇرىلىمعا اينالدى.

بۇل تۋرالى ۇلتتىق قوعامدىق سەنىم كەڭەسىنىڭ 5-وتىرىسىندا ق ر پرەزيدەنتى قاسىم- جومارت توقايەۆ ايتتى، دەپ حابارلايدى قازاقپارات ءتىلشىسى.

«ۇلتتىق كەڭەستىڭ جۇمىسى اۋەل باستان قوعامنىڭ ەرەكشە نازارىندا. ونىڭ جۇمىسىنا ساراپشىلار مەن ب ا ق-تا قىزىعۋشىلىق تانىتۋدا. ۇلتتىق كەڭەس قۇرامى جانە مىندەتتەرى تۋرالى ءارتۇرلى ۇسىنىستار ايتىلدى. ءتىپتى قاراما-قايشى پىكىرلەر دە بولدى. دەي تۇرعانمەن العاشقى كەزەڭنەن باستاپ ۇلتتىق كەڭەس جۇمىسقا بەلسەنە كىرىستى. ءبىز وسىندا قابىلداناتىن شەشىمدەر ارقىلى ەلدەگى جۇيەلى رەفورمالارعا وڭ سەرپىن بەرۋدى كوزدەيمىز. شىن ماندە ۇلتتىق قوعامدىق سەنىم كەڭەسى «حالىق ۇنىنە قۇلاق اساتىن مەملەكەت» تۇجىرىمداماسىن ىسكە اسىرۋعا زور ۇلەس قوسىپ كەلەدى. سوندىقتان وسى القالى جيىن ەلىمىزدەگى اۋقىمدى وزگەرىستەرگە جول اشىپ وتىر دەۋگە بولادى»، - دەدى مەملەكەت باسشىسى.

ق ر پرەزيدەنتىنىڭ اتاپ وتۋىنشە، 1,5 جىلدان استام ۋاقىت ىشىندە ناقتى ناتيجەلەرگە قول جەتكىزىلدى. كەڭەس مۇشەلەرى ساياسي رەفورمالاردىڭ ءبىرىنشى توپتاماسىنداعى شارالاردى جۇزەگە اسىرۋعا اتسالىستى. ەكىنشى توپتامادا كوزدەلگەن جۇمىستار دا اياقتالۋعا جاقىن. سونىمەن قاتار ساياسي رەفورمالاردىڭ ءۇشىنشى توپتاماسى بويىنشا جۇمىس باستالىپ كەتتى.

«بۇگىنگى تاڭدا ۇلتتىق كەڭەستىڭ ۇسىنىسىمەن 3 زاڭ قابىلداندى. تاعى 9 زاڭ جوباسى ازىرلەنىپ جاتىر. زاڭ شىعارۋ جاۋاپتى ءارى كۇردەلى جۇمىس ەكەنى بارشاعا بەلگىلى. وسى تۇرعىدان العاندا كەڭەس مۇشەلەرى اۋقىمدى جۇمىس اتقاردى. ۇلتتىق كەڭەس العاشقى كەزەڭدە ءوز قىزمەتىن كونسۋلتاتيۆتى-كەڭەسشى ورگان رەتىندە باستادى. ال بۇگىندە جاڭا رەفورمالار ۇسىناتىن ماڭىزدى قۇرىلىمعا اينالدى. كەڭەستىڭ ءاربىر مۇشەسىنە بەلسەندى قوعامدىق قىزمەتى ءۇشىن ريزاشىلىىمدى بىلدىرەمىن»، - دەدى قاسىم- جومارت توقايەۆ.

اۆتور: مارلان جيەمباي