قازاقستاندا ەڭ تومەنگى كەپىلدەندىرىلگەن زەينەتاقىنى كوتەرۋ جوسپارلانعان
بۇل تۋرالى ءماجىلىس دەپۋتاتتارىنىڭ ساۋالىنا ق ر پرەمەر-ءمينيسترى اسقار ءماميننىڭ جاۋابىندا ايتىلعان، دەپ حابارلايدى قازاقپارات ءتىلشىسى.
«ىنتىماقتى زەينەتاقى جىل سايىن يندەكساتسيالاناتىن تولەم سانالادى. ول ينفلياتسيانىڭ 2 پايىزىنان اسىپ تۇسەتىن دەڭگەيدە كەپىلدەندىرىلگەن. شىنايى تۇتىنۋشىلىق باعا مەن جالاقىنىڭ ءوسىم يندەكسى وتكەن كەزەڭنىڭ ءىس جۇزىندەگى مالىمەتتەرى نەگىزىندە قالىپتاسادى. سوندىقتان ىنتىماقتاستى زەينەتاقىنى ارتتىرۋ بارىسىندا ءتيىستى قارجى جىلىنداعى ينفلياتسيا ەسەپكە الىنادى. وسىعان وراي، شىنايى تۇتىنۋشىلىق باعا ءوسىمى، سونىمەن قاتار جالاقى ءوسىمى يندەكسىن، ياعني وتكەن كەزەڭ كورسەتكىشتەرىن ەسەپكە الا وتىرىپ، زەينەتاقىنى جىل سايىن يندەكساتسيالاۋ ماسەلەسىن قاراستىرۋ ماقساتقا ساي ەمەس»، - دەدى اسقار مامين.
ۇكىمەت باسشىسىنىڭ ايتۋىنشا، قازىرگى ۋاقىتتا زەينەتكەرلەردىڭ ماتەريالدىق جاعدايىن ارتتىرۋ ماقساتىندا زەينەتاقىمەن قامسىزداندىرۋدى ەڭ الدىمەن، بازالىق زەينەتاقىنى ەڭ تومەنگى كەپىلدەندىرىلگەن زەينەتاقىعا اۋىستىرۋ جولىمەن جاڭعىرتۋ جۇمىسى جۇرگىزىلىپ جاتىر.
«ەڭ تومەنگى كەپىلدەندىرىلگەن زەينەتاقىنى تاعايىنداۋ تەتىگى بازالىق زەينەتاقى تاعايىنداۋدىڭ قولدانىستاعى ادىستەمەسىنە نەگىزدەلەتىندىگى كوزدەلەدى. ءبىراق، بەلگىلى ءبىر پارامەترلەرى جەتىلدىرىلەدى. بۇل شارا ەڭ تومەنگى مولشەردى ەڭ تومەنگى كۇنكورىستى 54 تەن 70 پايىزعا دەيىن ارتتىرۋدى، سونىمەن قاتار مولشەردىڭ ەڭ تومەنگى شەكتەۋىن الىپ تاستاۋدى قاراستىرادى»، - دەدى ۇكىمەت باسشىسى.
سونىمەن قاتار پرەمەر- مينيستر زەينەتاقى جۇيەسىن جاڭعىرتۋدىڭ تاعى ءبىر ماڭىزدى باعىتى 2023 -جىلدان باستاپ جۇمىس بەرۋشىلەردىڭ مىندەتتى زەينەتاقى جيناعىن ەنگىزۋ ەكەندىگىن ايتادى. «جوسپارلانعان شارالار ەلدەگى جانە الەمدەگى قالىپتاسقان ەكونوميكالىق احۋالدى، الەۋمەتتىك جانە دەموگرافيالىق فاكتورلاردى، سونىمەن قاتار مەملەكەت باسشىسىنىڭ زەينەتاقى جۇيەسىن جاڭعىرتۋعا قاتىستى بەرگەن ءبىرقاتار تاپسىرماسىن تولىق كولەمدە ەسكەرەدى»، - دەدى اسقار مامين.
اۆتور: مارلان جيەمباي
