كوروناۆيرۋس: الەمدەگى ەپيدەميولوگيالىق جاعداي قانداي
روبەرت كوح ينستيتۋتىنىڭ مالىمەتىنشە، گەرمانيادا سوڭعى تاۋلىكتە كوروناۆيرۋس ينفەكسياسىنىڭ 9164 جاڭا جاعدايى تىركەلگەن، 490 ادام قايتىس بولعان. سوڭعى 7 كۇندە 100 مىڭ ادامعا شاققاندا 57,8 جۇقتىرۋ جاعدايى تىركەلگەن. ەل بيلىگى بۇل كورسەتكىشتىڭ 35 جاعدايعا دەيىن تومەندەۋى مۇمكىن ەكەندىگىن حابارلادى. 2020 -جىلدىڭ 2 - جەلتوقسانىندا اتالعان كورسەتكىش ەڭ جوعارى مانگە -197,6 جەتكەن بولاتىن.
يرلانديادا كوروناۆيرۋستىڭ برازيليالىق نۇسقاسىن ءۇش ادامدا تىركەلدى. ەلدىڭ دەنساۋلىق ساقتاۋ مينيسترلىگى جۇقتىرعانداردىڭ ۇشەۋى دە جاقىن ارادا برازيليادان ورالعاندىقتارىن حابارلادى. ەپيدەميا باستالعاننان بەرى 5 ميلليونعا جۋىق تۇرعىنى بار مەملەكەتتە 213,4 مىڭ ىندەتتى جۇقتىرسا، 4109 ادام قايتىس بولعان.
دۇنيەجۇزىلىك بانك ناۋرىز ايىنىڭ سوڭىنا دەيىن ەڭ كەدەي 12 ەلگە، اتاپ ايتقاندا بانگلادەش، تۋنيس جانە ەفيوپياعا ۆاكسينا ساتىپ الۋعا 1,6 ميلليارد دوللار ءبولۋدى جوسپارلاپ وتىرعانىن جەتكىزدى. بانك پرەزيدەنتى دەۆيد مالپاسس كەلەسى قادامدا تاعى 30 كەدەي ەلگە قولداۋ كورسەتەتىندىكتەرىن مالىمدەدى.
كوروناۆيرۋس جۇقتىرۋدىڭ ءبىر دە ءبىر جاعدايىن راستاماعان تۇرىكمەنستاندا سپۋتنيك V پرەپاراتىمەن حالىقتى ۆاكسيناتسيالاۋ ناۋقانى باستالدى. 18 جاسقا تولعان ازاماتتار اۋداندىق ەمحانالارعا ەگىلۋگە جازىلا الادى. اشحاباد تۇرعىندارىنىڭ ءۇيىنىڭ كىرەبەرىسىندە COVID-19 قارسى ۆاكسيناتسيا باستالعانى تۋرالى حابارلاندىرۋلار ىلىنە باستالعان. ەلدە «جۇقتىرۋ جاعدايلارىنىڭ بولماۋىنا» قاراماستان، بەتپەردە رەجيمى ەنگىزىلگەن، شەتەلدىك اۋە قاتىناسى، جولاۋشىلار پويىزدارى مەن قالاارالىق اۆتوبۋس قوزعالىسى توقتاتىلعان، مەشىتتەر، ساۋدا ورتالىقتارى، قوعامدىق تاماقتانۋ ورىندارى، مادەنيەت جانە تۇرمىستىق قىزمەت كورسەتۋ سالالارى جابىلعان.
ا ق ش پرەزيدەنتى دجو بايدەن امەريكاندىقتاردى كوروناۆيرۋسقا قارسى ەكپە الۋعا شاقىردى. «ۆاكسينا قاۋىپسىز، - دەدى ول. - مۇمكىندىك تۋا سالىسىمەن ەكپە جاساتىڭىز. بۇل پاندەميانى تەك وسىلاي عانا جەڭەمىز». پرەزيدەنت بۇل داعدارىستىڭ اياقتالاتىن كۇنىن ايتا المايتىنىن جەتكىزدى. «ءبىراق بۇل كۇندى جاقىنداتۋ ءۇشىن قولدان كەلگەننىڭ ءبارىن جاسايمىز» - دەدى بايدەن.
