قوس ەلدىڭ ازاماتتىعىمەن جۇرگەن ايەل قازاقستان اۋماعىنان شىعارىلدى

الماتى. قازاقپارات - كولىك پوليتسەيلەرى تۇركيا ازاماتشاسىن قوس ەل ازاماتتىعىن پايدالانعانى ءۇشىن اكىمشىلىك جاۋاپكەرشىلىككە تارتتى، دەپ حابارلايدى قازاقپارات.

الماتى قالاسىنىڭ اۋەجايىندا جەلىلىك پوليتسيا ءبولىمىنىڭ قىزمەتكەرلەرى «انتاليا- الماتى» اۋە رەيسىمەن ۇشىپ كەلگەن قازاقستان جانە تۇركيانىڭ قوس ازاماتتىعى بار 1987 -جىلى تۋعان ايەلدى انىقتادى.

وعان قاتىستى ق ر ا ق ب ت ك 496-بابىنىڭ 2-بولىگى، ياعني، قازاقستان زاڭناماسىندا بەلگىلەنگەن مەرزىمدە شەتەل ازاماتتىعىن الۋ فاكتىسىن حابارلاماۋ بويىنشا اكىمشىلىك حاتتاما تولتىرىلدى. الماتى قالاسىنىڭ مامانداندىرىلعان اۋدانارالىق اكىمشىلىك سوتىنىڭ شەشىمىمەن تۇركيا ازاماتشاسى 5 جىل مەرزىمگە ق ر اۋماعىنان اكىمشىلىك جولمەن شىعارىپ جىبەرۋ تۇرىندەگى جاۋاپكەرشىلىككە تارتىلدى.

ايتا كەتەيىك، جىلدىڭ باسىنان بەرى كولىك پوليتسەيلەرى قوس ەل ازاماتتىعى بار 3 ازاماتتى انىقتادى، ونىڭ ەكەۋى - تۇركيا، ال بىرەۋى – ا ق ش ازاماتى.