مەملەكەت باسشىسى: سالىق زيمانوۆتىڭ مول مۇراسى ەل يگىلىگىنە اينالا بەرەدى
ءىس- شارا ەل تاۋەلسىزدىگىنىڭ 30 جىلدىعى اياسىندا ۇيىمداستىرىلىپ وتىر. كونفەرەنسيا مەملەكەت باسشىسى قاسىم- جومارت توقايەۆتىڭ قۇتتىقتاۋىمەن اشىلدى. ق ر پرەمەر-ءمينيسترىنىڭ ورىنباسارى ەرالى توعجانوۆ مەملەكەت باسشىسىنىڭ قۇتتىقتاۋ ءسوزىن وقىدى.
«قۇرمەتتى كونفەرەنسياعا قاتىسشىلار! بۇگىن اسا كورنەكتى عالىم، اكادەميك سالىق زيمانوۆتىڭ تۋعانىنا 100 جىل تولدى. بۇگىن زاڭ عىلىمى عانا ەمەس، بۇكىل ەلىمىز ءۇشىن ايتۋلى كۇن. سالىق زيمان ۇلى تاۋەلسىز قازاقستاننىڭ قۇقىقتىق نەگىزدەرىن قالىپتاستىرۋعا وراسان زور ەڭبەك ءسىڭىردى. ول مەملەكەتتىك، ەگەمەندىك تۋرالى دەكلاراتسيانى، قازاقستان رەسپۋبليكاسىنىڭ مەملەكەتتىك تاۋەلسىزدىگى تۋرالى كونستيتۋتسيالىق زاڭدى - العاشقى اتا زاڭىمىزدى ازىرلەۋگە ات سالىستى. سونداي- اق، قازاقستانداعى پارلامەنتاريزم ينستيتۋتىن دامىتۋعا بارىنشا ۇلەس قوستى. ايگىلى عالىم قۇقىق سالاسىنىڭ قىر- سىرىنا تەرەڭ بويلاپ، تاعىلىمدى ەڭبەكتەر جازىپ قالدىردى. اسىرەسە ەلىمىزدىڭ ساياسي جانە قۇقىقتىق دامۋ تاريحى، بيلەر ينستيتۋتى سياقتى ۇلكەن تاقىرىپتاردى تەرەڭ زەرتتەدى. ونىڭ مول مۇراسى الداعى ۋاقىتتا دا ەل يگىلىگىنە اينالا بەرەتىنى انىق»، - دەلىنگەن مەملەكەت باسشىسىنىڭ قۇتتىقتاۋ سوزىندە.
پرەزيدەنتتىڭ ايتۋىنشا، سالىق زيمان ۇلى ۇلاعاتتى ۇستاز رەتىندە كوپتەگەن بىلىكتى زاڭگەرلەر تاربيەلەپ ءوسىردى.
«ونىڭ شاكىرتتەرى ەل ەكونوميكاسىنىڭ ءتۇرلى سالاسىندا تابىستى ەڭبەك ەتىپ ءجۇر. ونىڭ مەرەيتويى تاۋەلسىزدىگىمىزدىڭ 30 جىلدىعىمەن تۇسپا-تۇس كەلىپ وتىر. مۇنىڭ سيمۆولدىق ءمانى زور. تۋعان ەلىنە قالتقىسىز قىزمەت ەتكەن سالىق زيمانوۆتىڭ عيبراتتى عۇمىرى جاس ۇرپاققا ءاردايىم ۇلگى- ونەگە. كونفەرەنتسيا جۇمىسى تابىستى بولسىن، ەگەمەندى ەلىمىز وركەندەي بەرسىن!»، - دەيدى مەملەكەت باسشىسى.
ءىس-شارا اياسىندا ل. ن. گۋميلەۆ اتىنداعى ە ۇ ۋ-دىڭ زاڭ فاكۋلتەتىندە اكادەميك سالىق زيمانوۆ اتىنداعى اۋديتوريانىڭ اشىلۋى ءوتىپ، عىلىمي ەڭبەكتەرى مەن ءومىربايانىنىڭ فوتوماتەريالدار كورمەسى ۇيىمداستىرىلادى.
