ۆاكسيناتسيا نۇر-سۇلتان قالاسىندا قالاي جۇرگىزىلۋدە؟
«بۇگىنگى تاڭدا ەلوردامىزدا ۆاكسيناتسيىنىڭ ءۇشىنشى اپتاسى اياقتالدى. ۆاكسينالاۋ ەمحانالاردا، ينفەكسيالىق ستاتسيونارلاردىڭ، جەدەل مەديتسينالىق جاردەم، العاشقى مەديتسينالىق سانيتارلىق كومەك ۇيىمدارىنىڭ، كوپبەيىندى ستاتسيونارلاردىڭ قابىلداۋ بولىمدەرىنىڭ مەديتسينا قىزمەتكەرلەرىنە وتكىزىلۋدە. ءتيىستى كونتينگەنت ىشىندە 6300 ادامنىڭ 1980 ى ۆاكسينا الدى. ولاردىڭ اراسىندا اسقىنۋ انىقتالعان جوق. قازىرگى ۋاقىتتا ۆاكسيناتسيا رەسەيلىك «گام- كوۆيد- ۆاك» ۆاكسيناسىمەن ءجۇرىپ جاتىر. پرەپارات ەكى كومپونەنتتى، ءۇش اپتا ارالىقپەن ەكى رەت ەگىلەدى»، - دەدى ءاليا ءومىرزاقوۆا نۇر-سۇلتان قالاسىنىڭ اكىمدىگىندە وتكەن ونلاين بريفيرنگتە.
ەكىنشى كومپونەنتپەن ۆاكسينالاۋ 22-اقپاندا باستالادى. ۆاكسيناتسيا تولىق كۋرستان كەيىن ءبىر جارىم اي ىشىندە اعزانىڭ يممۋندىق رەاكسياسىن تۋدىرادى. سوندىقتان ۆاكسينا العان ادامدارعا الدىن الۋ شارالارىن ساقتاۋدى جالعاستىرۋ قاجەت.
«ۆاكسينانىڭ كەلەسى جەتكىزىلىمى اقپان ايىنىڭ سوڭىندا كۇتىلۋدە. ۆاكسينانىڭ جاڭا پارتياسى كەلىپ تۇسكەن ۋاقىتتا مەديتسينا قىزمەتكەرلەرىن ەگۋدى جالعاستىرامىز. سونداي-اق، پەداگوگتاردى، كۇش قۇرىلىمدارى قىزمەتكەرلەرىن، سوزىلمالى اۋرۋى بارلاردى جانە باسقالاردى كەزەڭ- كەزەڭىمەن ەگۋدى باستايمىز. العاشقى مەديتسينالىق- سانيتاريالىق كومەك ۇيىمدارىنا ۆاكسيناتسيا جۇرگىزۋ ءۇشىن ەگۋ كابينەتتەرى، كۇتۋ زالدارى ازىرلەندى. ۆاكسينا العان ادامدار 30 مينۋت بويى دارىگەر باقىلاۋىندا بولۋى ءتيىس. ۆاكسينالاردى تاسىمالداۋعا ارنالعان 20 مۇزداتقىش جانە 82 تەرموكونتەينەر بار. قوسىمشا 22 مۇزداتقىش قوندىرعى ساتىپ الىندى. بۇل قاجەتتىلىكتى تولىعىمەن جابادى. بارلىق ءتيىستى تۇلعالار كوروناۆيرۋسقا قارسى ۆاكسينانى تىركەلگەن ەمحانالاردا تەگىن الا الادى»، - دەدى ءاليا ءومىرزاقوۆا.
اۆتور: ايجان سەرىكجان قىزى
