كەيبىر جوعارى وقۋ ورىندارىندا قانداي كەمشىلىك بار

نۇر- سۇلتان. قازاقپارات – ق ر ب ع م ءبىلىم جانە عىلىم سالاسىنداعى باقىلاۋ كوميتەتىنىڭ ءتوراعاسى گۇلزات كوبەنوۆا قاشىقتان وقىتۋ كەزىندە كەيبىر ج و و- لار اكادەميالىق ساياساتىن دۇرىس جۇرگىزبەي كەلەتىنىن ايتتى، دەپ حابارلايدى قازاقپارات ءتىلشىسى.

«قازىرگى كەزدە جوعارى وقۋ ورىندارى قاشىقتان ءبىلىم بەرىپ جاتىر. تەكسەرۋ بارىسىندا قاشىقتان وقىتۋ كەزىندە دە ساباق بولماي جاتقانىن بايقادىق. كەيبىر جوعارى وقۋ ورىندارى وزدەرىنىڭ اكادەميالىق ساياساتىن دۇرىس جۇرگىزبەي كەلەدى. ستۋدەنتتەر ساباققا قاتىسپاي- اق، ناتيجەسىندە ەمتيحاندى تاپسىرىپ، باعا الادى. سوندا قانداي مامان شىعادى؟»، - دەدى گ. كوبەنوۆا ورتالىق كوممۋنيكاتسيالار قىزمەتىندە.

ونىڭ ايتۋىنشا، وسىنداي كەمشىلىكتەر بولعان جاعدايدا زاڭناماعا سايكەس ءتيىستى شارالار قابىلدانادى. «ەڭ باستىسى، جوعارى وقۋ ورىندارىنىڭ ماقساتى - اكادەميالىق دەربەستىكتى دۇرىس پايدالانا وتىرىپ، زاڭناما تالاپتارىن ورىنداۋ مەن ساپالى ءبىلىمدى قامتاماسىز ەتۋ»، - دەدى كوميتەت باسشىسى.

«مينيسترلىك ساپاسىز ءبىلىم بەرەتىن جوعارى وقۋ ورىندارىنا قاتىستى ماسەلەنى شەشۋ بويىنشا ءتيىستى جۇمىستاردى اتقارىپ كەلەدى. قازىرگى كەزدە مەملەكەتتىك باقىلاۋ كاسىپكەرلىك كودەكسكە سايكەس جۇرگىزىلەدى. ءبىرىنشى باعىتى - پروفيلاكتيكالىق باقىلاۋ. وسىنىڭ ناتيجەسىنىڭ نەگىزىندە جوعارى وقۋ ورنىنا ەكى مۇمكىندىك قوسىمشا بەرىلەدى. ەڭ باستىسى، بۇل جەردە جوعارى وقۋ ورىندارىنىڭ ماقساتى - اكادەميالىق دەربەستىككە قاراماستان ءبىلىم سالاسىنداعى زاڭنامانى بۇزباۋ ءارى كەمشىلىكتەرگە جول بەرمەۋ. ەگەر پروفيلاكتيكالىق باقىلاۋدىڭ ناتيجەسى بويىنشا كەمشىلىكتەر انىقتالسا، جوعارى وقۋ ورنىنا ەكىنشى مۇمكىندىك بەرىلەدى»، - دەدى گ. كوبەنوۆا ورتالىق كوممۋنيكاتسيالار قىزمەتىندە.

وسى ورايدا ول تەكسەرىس جۇرگىزىلگەننەن كەيىن قايتادان تالاپتاردى بۇزۋ انىقتالىپ جاتسا، وندا ءۇشىنشى تەكسەرىس جۇرگىزىلەتىنىن ناقتىلادى. تەك ءۇشىنشى تەكسەرىستەن سوڭ ءتيىستى شەشىم قابىلدانادى. اكىمشىلىك كودەكسكە سايكەس كەمشىلىككە قاراي ءتيىستى باپپەن شارا قولدانىلادى. سونىمەن قاتار ول جوسپاردان تىس تەكسەرۋلەرگە توقتالدى.

«مينيسترلىككە اتا- انالاردان، ستۋدەنتتەردەن، وقىتۋشىلاردان وتىنىشتەر كەلىپ ءتۇسىپ جاتادى. وسى وتىنىشتەرگە قاتىستى مينيسترلىك ءوز تاراپىنان كوتەرىلگەن ماسەلەلەر تۇرعىسىندا تەكسەرىس جۇرگىزەدى. كوبىنە ارىز جازاتىندار وزدەرىنىڭ مالىمەتتەرىن (اتى- ءجونىن) كورسەتپەيدى، ياعني ارىزدان كەيىن وزدەرىنە كەسىرى تيەدى دەپ ويلايدى. اتاپ ايتقاندا، ەگەر كەمشىلىكتەر بولسا، سىزدەر الاڭداتاتىن ماسەلەلەر بويىنشا مىندەتتى تۇردە مينيسترلىككە جانە ءتيىستى بايلانىس جەلىسىنە حابارلاسا الاسىزدار»، - دەدى كوميتەت باسشىسى.

«تەكسەرىستەر ناتيجەسىنە توقتالساق، شىن مانىندە جوعارى وقۋ ورىندارىنىڭ كەيبىرىندە ءتيىستى جاعداي جاسالماعان. ج و و- دا وقىتۋشىسىز وقۋ ءۇردىسى قالاي جۇرگىزىلەدى؟ بۇل تۇرعىدا سىرتتان شاقىرتىلعان وقىتۋشىلار قامتىلعان. ولار باسقا جەردە جۇمىس ىستەيدى دە، قوسىمشا جوعارى وقۋ ورنىندا ساباق بەرەدى. وسى ورايدا قانداي ساپا بولادى؟ كەلگەن وقىتۋشىلاردىڭ ءتيىستى بىلىكتىلىگى بولماي جاتادى. ءبىلىم بەرۋ باعدارلامالارىنىڭ ساپاسىنا بايلانىستى سۇراقتار بار. ارينە، قۋاناتىن جاعدايلار دا بار، ءۇش جىلدىڭ ىشىندە ءبىلىم بەرۋ باعدارلامالارىنىڭ ساپاسى 3 ەسەگە وسكەن. دەگەنمەن، ءالى دە كەيبىر وقۋ ورىندارى ءتيىستى جۇمىستاردى اتقارۋى كەرەك»، - دەدى گۇلزات كوبەنوۆا. مۇنىمەن قوسا ول كەيبىر ج و و- لار ماتەريالدىق- تەحنيكالىق بازاسى جاعىنان اقساپ تۇرعانىن ايتتى.

اۆتور: رۋسلان عابباسوۆ