پەتروپاۆلدا قالتا ۇرلىعىن كاسىپ ەتكەن ەكى ەلوردالىق بويجەتكەن ۇستالدى

پەتروپاۆل. قازاقپارات - پەتروپاۆلدىڭ ءتارتىپ ساقشىلارى جۇرتتىڭ قالتاسىنداعى اقشاسىن ۇرلاعان نۇر-سۇلتان قالاسىنىڭ ەكى تۇرعىنىن ۇستادى، دەپ حابارلايدى قازاقپارات ءتىلشىسى.

سولتۇستىك قازاقستان وبلىسى پوليتسيا دەپارتامەنتى باسپا ءسوز قىزمەتىنىڭ مالىمەتىنشە، جەلتوقسان ايىندا پەتروپاۆلداعى ساۋدا نىساندارىنىڭ اۋماعىندا بىردەن ەكى قالتا ۇرلىعى جاسالعان. بەلگىسىز بىرەۋلەر ساتىپ الۋشىلاردى «شەبەرلىكپەن» توناپ، ايەلدەردىڭ 15 مىڭ جانە 50 مىڭ تەڭگەسىن، قۇجاتتارى مەن بانك كارتاسىن الىپ كەتكەن.

بۇل دەرەك سوتقا دەيىنگى تەرگەپ- تەكسەرۋلەردىڭ تىزىلىمىنە «ۇرلىق» بابى بويىنشا ەنگىزىلدى. پوليتسەيلەر جەدەل تەرگەۋ بارىسىندا ەكى قالتا ۇرلىعىنا قاتىستى كۇدىكتىلەردى انىقتادى. 21 جانە 25 جاستاعى ەكى بويجەتكەن قالانى ارالاپ، جۇرتتىڭ قالتاسىن قاعۋدى كاسىپ ەتكەن ەكەن.

ەكەۋى دە وسىنداي قىلمىس ءۇشىن بۇعان دەيىن سوتتالعان. پەتروپاۆل پوليتسەيلەرى استاناعا كەلىپ، ەكى كۇدىكتىنى ۇستادى.

«ەكەۋى دە كەلتىرىلگەن شىعىننىڭ ورنىن تولتىرۋعا ءازىر جانە ايتۋىنشا، ىستەگەن ىستەرىنە وكىنەدى. سوڭعى كەزدە قالتا ۇرلىعى ۇمىتىلىپ بارادى. وعان بەينەكامەرالاردى كوبەيتۋ سەبەپ. سونداي-اق پروفيلاكتيكالىق ءىس- شارالار دا ناتيجەسىن بەرىپ جاتىر. بىلتىر 12 قالتا ۇرلىعى تىركەلگەن، بۇل 2019 -جىلمەن سالىستىرعاندا %33 عا تومەن»، - دەيدى س ق و پ د كريمينالدىق پوليتسيا باسقارماسىنىڭ باستىعى پەتر كليموۆ.

اۆتور: اقەركە داۋرەنبەك قىزى