قازاقستاندىق جازۋشى تاۋفيك كارىموۆ حالىقارالىق لوندون سىيلىعىنىڭ لاۋرەاتى اتاندى
بۇل اۋقىمدى جوبا الەمنىڭ تۇكپىر- تۇكپىرىندەگى جازۋشىلارعا ءوز شىعارمالارىن حالىقارالىق ارەنادا ۇسىنۋعا، گرانتتار مەن قۇرمەتتى اتاقتارعا يە بولۋعا مۇمكىندىك بەردى، دەپ حابارلايدى قازاقپارات.
ينتەرناتسيونالدىق جازۋشىلار وداعىنىڭ باسپا ءسوز قىزمەتىنەن ءمالىم ەتكەندەي، بايقاۋعا الەمنىڭ 15 ەلىنەن زاماناۋي جانە دارىندى اۆتورلار ايزەك ادامسون (ا ق ش)، مەلۆين بيەردجەسس ( ۇلى بريتانيا)، ريچارد گلوۆەر (اۋستراليا)، انتە كروگ (وار)، لايموناس تاپيناس (ليتۆا)، سەرگەي لۋكيانەنكو (رەسەي) جانە باسقالارى قاتىستى.
حالىقارالىق لوندون سىيلىعى كوپتەگەن قاتىسۋشىعا العا قاراي ۇلكەن قادام جاساۋعا كومەكتەستى. سىيلىق التى نوميناتسياعا ءبولىندى جانە اۆتورلاردىڭ كاسىبي دارەجەسىنە سايكەس بىرنەشە كەزەڭنەن جانە ساناتتاردان تۇردى. لونگ- پاراقشاعا ەنگەن اۆتورلار «جىلدىڭ ۇزدىك اۆتورى» اتاعىن الدى جانە «لوندون سىيلىعى جازۋشىنى ۇسىنادى» سەرياسىمەن كىتاپ شىعارۋ مۇمكىندىگىنە يە بولدى.
حالىقارالىق لوندون سىيلىعىن ۇيىمداستىرۋشىلاردىڭ ارقاسىندا ءار ەلدىڭ 500-دەن استام اقىن- جازۋشىسى الەمدىك ارەناعا شىعىپ، ءوزىن شەتەلدىك اۋديتورياعا تانىتا الدى. سىيلىق لاۋرەاتتارى تاۋفيك كارىموۆ (قازاقستان)، دەن براۋن (ا ق ش)، ورر ۆەندي (اۋستراليا)، داففي كەرول ەنن ( ۇلى بريتانيا)، ۆيكتوريا ليەۆينا (يزرايل)، لي مي- يۋنگ (كانادا)، پاۆەل گۋبين (ا ق ش)، يگوني باررەتت (نيگەريا)، حان گان (وڭتۇستىك كورەيا)، لۋنا ەل (فرانسيا)، اليسا ليپپارت (نورۆەگيا)، ولەگ شتەلمان (ليتۆا)، ساريا ماممادوۆا (ازەربايجان)، ليۋبوۆ پيۆنيك (ا ق ش) جانە باسقالارى بولدى.
قازاقستاندىق تاۋفيك كارىموۆ «جۇلدىزدار» اتالىمىندا «شاعىن پروزا» نوميناتسياسى بويىنشا چارلز ديككەنس سىيلىعىنىڭ لاۋرەاتى بولدى. ونىڭ بايقاۋعا قاتىسقان تۋىندىسى - اعىلشىن جانە ورىس تىلدەرىندە جارىق كورگەن «Fata Morgana» كىتابى.
ايتا كەتەيىك، ت. كارىموۆ ساجيدا سۋلەيمانوۆا اتىنداعى ادەبي سىيلىقتىڭ (تاتارستان رەسپۋبليكاسى) لاۋرەاتى، تۋسسون قالاسىنىڭ (ا ق ش) قۇرمەتتى ازاماتى. ورىس، قازاق، تاتار جانە اعىلشىن تىلدەرىندە جارىق كورگەن كىتاپتاردىڭ اۆتورى، سونداي- اق قازاقستان، ينتەرناتسيونالدىق، رەسەي، تاتارستان جانە ازەربايجان جازۋشىلار وداقتارىنىڭ مۇشەسى. قازىرگى كەزدە قازاقستان تاتارلارى مەن باشقۇرتتارىنىڭ كونگرەسىن باسقارادى. بۇدان بولەك، دۇنيەجۇزىلىك تاتارلار كونگرەسى ۇلتتىق كەڭەسى ءتوراعاسىنىڭ ورىنباسارى.
اۆتور: اياۋلىم التىنبەك
